തിരുവനന്തപുരം: വൈദ്യുതി പോസ്റ്റുകളിലെ തെരഞ്ഞെടുപ്പ് പോസ്റ്ററുകളും എഴുത്തും നീക്കം ചെയ്യാത്തതു സംബന്ധിച്ച റിപ്പോര്‍ട്ട് നല്‍കാത്തതിന് വൈദ്യുതി ബോര്‍ഡിന് തെരഞ്ഞെടുപ്പ് കമ്മിഷന്‍ നോട്ടിസ് നല്‍കി. കെ.എസ്.ഇ. ബി ചെയര്‍മാന് മുഖ്യതിരഞ്ഞെടുപ്പ് ഓഫിസര്‍ ടിക്കാറാം മീണയാണ് കാരണം കാണിക്കല്‍ നോട്ടിസ് നല്‍കിയിരിക്കുന്നത്.
വൈദ്യുതി പോസ്റ്റുകളില്‍ നിന്ന് പോസ്റ്ററുകള്‍ ഉള്‍പ്പെടെയുള്ള തെരഞ്ഞെടുപ്പ് പ്രചാരണ സാമഗ്രികളും എഴുത്തുകളും നീക്കം ചെയ്ത് റിപ്പോര്‍ട്ട് നല്‍കാന്‍ 15 ദിവസം മുമ്പ് കെ.എസ്.ഇ.ബി ചെയര്‍മാന് ഇലക്ഷന്‍ വിഭാഗം ആദ്യം കത്തു നല്‍കിയിരുന്നു. മറുപടി ലഭിക്കാതിരുന്നതിനെ തുടര്‍ന്ന് റിപ്പോര്‍ട്ട് ആവശ്യപ്പെട്ട് മറ്റൊരു കത്തുകൂടി നല്‍കി. രണ്ടിനും മറുപടി ലഭിക്കാതിരുന്ന സാഹചര്യത്തിലാണ് കാരണം കാണിക്കല്‍ നോട്ടിസ് നല്‍കിയിരിക്കുന്നത്. ചെയര്‍മാന്റെ മറുപടി ലഭിച്ച ശേഷം തുടര്‍ നടപടികള്‍ സ്വീകരിക്കാനാണ് തെരഞ്ഞെടുപ്പ് കമ്മിഷന്റെ തീരുമാനം.