മലപ്പുറം: തേഞ്ഞിപ്പലം മാതാപ്പുഴ കടലുണ്ടിപ്പുഴയില്‍ ഒഴുക്കില്‍പ്പെട്ട് കാണാതായ കുട്ടിയുടെ മൃതദേഹം കണ്ടെത്തി. ചൊവ്വാഴ്ച വൈകീട്ടോടെ വള്ളിക്കുന്ന് അരിയല്ലൂര്‍ ഭാഗത്ത് മൃതദേഹം പൊങ്ങുകയായിരുന്നു.

വള്ളിക്കുന്ന് ആരില്ലൂരില്‍ വൈകിട്ട് ആറ് മണിയോടെയാണ് കാണാതായ ഏഴുവയസ്സുകാരന്‍ മുഹമ്മദ് റബീഹിന്റെ മൃതദേഹം കണ്ടെത്തിയത്. മൃതദേഹം റബീഹിന്റെതാണോ എന്ന സംശയത്തില്‍ കുടുംബത്തെ എത്തിച്ച് സ്ഥിതീകരിക്കുകയായിരുന്നു. പരപ്പനങ്ങാടി പൊലിസ് സ്ഥലത്തെത്തി പരിശോധനകള്‍ പൂര്‍ത്തിയാക്കി കുട്ടിയുടെ മൃതദേഹം ആശുപത്രിയിലേക്ക് മാറ്റി.

രണ്ടുദിവസം തുടര്‍ച്ചയായി നടത്തിയ പരിശോധനയില്‍ കുട്ടിയെ കണ്ടെത്താനാകാത്ത സാഹചര്യത്തില്‍ രാവിലെ കൊച്ചിയില്‍ നിന്നെത്തിയ നേവി സംഘവും പുഴയില്‍ തിരച്ചില്‍ ഊര്‍ജ്ജിതമാക്കിയിരുന്നു. സംഘവും അഗ്‌നിശമന സേനയും നാട്ടുകാരും സംയുക്തമായി പുഴയുടെ വിവിധ ഭാഗങ്ങളില്‍ നടത്തിയ തിരച്ചിലില്‍ കുട്ടിയെ കണ്ടെത്താനായില്ല. വൈകീട്ടോടെയാണ് മൃതദേഹം വള്ളിക്കുന്ന് അരിയല്ലൂരില്‍ പൊങ്ങിയതായി കണ്ടെത്തിയത്.