തൊടുപുഴ:  നഗരസഭാപരിധിക്കുളളില്‍ നിയമവാഴ്ച ഉറപ്പുവരുത്തേണ്ട മുനിസിപ്പല്‍ കൗണ്‍സില്‍തന്നെ നിയമങ്ങളും ചട്ടങ്ങളും ലംഘിച്ച് തീരുമാനങ്ങളെടുക്കുന്നത് ജനപ്രതിനിധിസഭയുടെ അന്തസിനും ഭരണഘടനാപദവിക്കും യോജിക്കാത്തതാണെന്ന് മുനിസിപ്പല്‍ ആന്‍ഡ് കോര്‍പ്പപറേഷന്‍ സ്റ്റാഫ് യൂണിയന്‍ തൊടുപുഴ യൂണിറ്റ് സമ്മേളനം. ഭരണാധികാരികള്‍ എടുക്കുന്ന ഇത്തരം നിയമവിരുദ്ധ തീരുമാനങ്ങളും നിര്‍ദേശങ്ങളും നടപ്പിലാക്കാന്‍ ജീവനക്കാര്‍ക്ക് ബാധ്യതയില്ല.
നിക്ഷിപ്ത താല്‍പര്യക്കാരുടെയും ചില രാഷ്ട്രീയനേതൃത്വങ്ങളുടെയും സമ്മര്‍ദങ്ങള്‍ക്കുവഴങ്ങി ജനപ്രതിനിധികള്‍ ചട്ടലംഘനത്തിന് മുതിരുന്നത്'ഭീരുത്വവും സത്യപ്രതിജ്ഞാലംഘനവുമാണ്.  ഇത് നഗരസഭാ പ്രവര്‍ത്തനങ്ങളെ പ്രതിസന്ധിയിലാക്കും.
 അഴിമതിരഹിതവും കാര്യക്ഷമവുമായ പ്രവര്‍ത്തനങ്ങളിലൂടെ നഗരസഭയെ ജനപക്ഷ-ജനസൗഹൃദ കേന്ദ്രമാക്കി മാറ്റുന്നതിനുളള എല്ലാ നടപടികള്‍ക്കും ജീവനക്കാരുടെ പിന്തുണയുണ്ടാകുമെന്നും ഇതിന് വിഘാതമായി നില്‍ക്കുുന്ന ഒരു ജീവനക്കാരനെയും സംഘടന സംരക്ഷിക്കുകയില്ലന്നും സമ്മേളനം പ്രഖ്യാപിച്ചു.
    യൂണിറ്റ് പ്രസിഡന്റ് എന്‍ ഗോവിന്ദന്റെ അധ്യക്ഷതയില്‍ തൊടുപുഴ എന്‍ജിഒ യൂണിയന്‍ ഹാളില്‍ ചേര്‍ന്ന സമ്മേളനം സിഐടിയു. ജില്ലാ ജോയിന്റ് സെക്രട്ടറി ടി ആര്‍ സോമന്‍ ഉദ്ഘാടനം ചെയ്തു.
നഗരസഭാ കൗണ്‍സിലര്‍ പി.വി ഷിബു, എന്‍ജിഒ യൂണിയന്‍ ജില്ലാ പ്രസിഡന്റ് കെ കെ പ്രസുഭകുമാര്‍, കെഎംസിഎസ്‌യു ജില്ലാ പ്രസിഡന്റ് സി ബി ഹരികൃഷ്ണന്‍, ജോയിന്റ് സെക്രട്ടറി വി.എസ്.എം നസീര്‍, യൂണിറ്റ് സെക്രട്ടറി എം എം സുമേഷ്, എന്‍ പി രമേഷ്‌കുമാര്‍, വി ബി ഓമനക്കുട്ടന്‍, ബിനു കൃഷ്ണന്‍കുട്ടി, സെയ്തുമുഹമ്മദ്, ഇ ഡി ത്രേസ്യ, ആര്‍ ലത എന്നിവര്‍ സംസാരിച്ചു.
ഭാരവാഹികളായി എന്‍ ഗോവിന്ദന്‍ (പ്രസിഡന്റ്), ലീലാമ്മ മാമന്‍(വൈസ് പ്രസിഡന്റ്), എം എം സുമേഷ് (സെക്രട്ടറി), ബിനു കൃഷ്ണന്‍കുട്ടി (ജോയിന്റ് സെക്രട്ടറി), വി ബി ഓമനക്കുട്ടന്‍ (ട്രഷറര്‍) എന്നിവരെ തെരഞ്ഞെടുത്തു.