കൊച്ചി: വേനല്‍ മഴക്കൊപ്പമെത്തിയ ഇടിമിന്നലില്‍ രണ്ടുപേര്‍ മരിച്ചു. എറണാകുളം ജില്ലയിലെ മുളന്തുരുത്തി വെട്ടിക്കലിലാണ് ഇടിമിന്നലേറ്റ് ഒരു കുടുംബത്തിലെ രണ്ട് പേര്‍ മരിച്ചത്. വെട്ടിക്കല്‍ ചെരിക്കന്‍ കുഴിയില്‍ സാജുവിന്റെ വീട്ടില്‍ വാടകയ്ക്ക് താമസിക്കുന്ന പാമ്പ്ര ആളു പറമ്പില്‍ ജോണിയുടെ ഭാര്യ ലിസി (49) ജോണിയുടെ സഹോദരിയുടെ മകന്‍ അനക്‌സ് (15) എന്നിവരാണ് മരിച്ചത്.
വൈകിട്ട് 4.30 ഓടെയാണ് അപകടം ഉണ്ടായത്. ഇരുവരും വീടിന്റെ പിന്നിലെ വരാന്തയില്‍ നില്‍ക്കുമ്പോഴാണ് ഇടിമിന്നലേറ്റത്. സംഭവ സ്ഥലത്ത് തന്നെ രണ്ടു പേരും മരിച്ചിരുന്നു.