ജിദ്ദ: ലോകം വിവിധ വെല്ലുവിളികളെ നേരിടുന്ന സമയത്ത്‌ മനുഷ്യ വിഭവശേഷി പങ്കുവെക്കൽ സമൂഹിക പ്രതിബദ്ധതയോടെയാവണമെന്ന് ഫാറൂഖ് കോളേജ് പൂര്‍വ്വ വിദ്യാർത്ഥി സംഗമം ജിദ്ദ ചാപ്റ്റര്‍ (ഫോസ-ജിദ്ദ) അഭിപ്രായപ്പെട്ടു. യോഗത്തിൽ മുന്‍ ഫാറൂഖ് കോളജ് പ്രിന്‍സിപ്പലും ഫോസ കേന്ദ്ര കമ്മിറ്റി അംഗവുമായ പ്രൊഫ ഇ. പി. ഇമ്പിച്ചി കോയ മുഖ്യാതിഥിയായിരുന്നു. ചാപ്റ്റർ പ്രസിഡന്റ് അഷ്‌റഫ് മേലേവീട്ടിൽ അദ്ധ്യക്ഷം വഹിച്ചു. സാമ്പത്തികമായി പ്രയാസ മനുഭവിക്കുന്ന പരിസര വാസികളുടെയും, കോളേജിലെ വിദ്യാർത്ഥികളുടെയും ക്ഷേമത്തിനായി ഫാറൂഖ് കോളേജ് നടപ്പാക്കിക്കൊണ്ടിരിക്കുന്ന വിവിധ പദ്ധതികള്‍ ആയ എഡ്യു സപ്പോര്‍ട്ട്, വണ്‍ ഫോര്‍ വണ്‍ (വിദ്യാർത്ഥികളെ ദത്തെടുക്കൽ), ഡയാലിസിസ് സെന്റര്‍ എന്നിവക്ക് ഫോസ ജിദ്ദ ഉദ്ദേശിക്കുന്ന സഹായ പദ്ധതികൾ അദ്ദേഹം വിശദീകരിച്ചു.

     കോളജ് സ്ഥാപക നേതാവും പണ്ഡിതനുമായ അബു സബാഹ് അഹമ്മദ് അലി സാഹിബ് അനുസ്മരണം ലിയാഖത്ത് കോട്ട നിര്‍വഹിച്ചു. ഫാറൂഖ് കോളേജും മറ്റു അന്താരാഷ്ട്ര യൂണിവേഴ്‌സിറ്റികളും തമ്മിലുള്ള വിഭവ കൈമാറ്റ പ്രോഗ്രാമുകൾ ഡോ: ഇസ്മയില്‍ മരിതേരി വിശദീകരിച്ചു. ഇന്ത്യ ഗവണ്മെന്റ് അംഗീകരിച്ചു നടപ്പാക്കാൻ ഉദ്ദേശിക്കുന്ന പുതിയ വിദ്യാഭ്യാസ നയം ചർച്ചചെയ്യാൻ ആഗസ്ത് 21ന് പ്രഗത്ഭരെ ഉൾകൊള്ളിച്ചു വിപുലമായ ഒരു സൂം സെമിനാര് സംഘടിപ്പിക്കാൻ യോഗം തീരുമാനിച്ചു. അമീര്‍ അലി, നാസര്‍ ഫറോക്ക്, ഇഖ്ബാല്‍ സി കെ പള്ളിക്കല്‍, സംസാരിച്ചു. കെ.എം. മുഹമ്മദ് ഹനീഫയുടെ ഖുർആൻ പാരായണത്തോടെ തുടങ്ങിയ യോഗത്തിൽ സെക്രട്ടറി സാലിഹ് കാവോട്ട് സ്വാഗതവും ബഷീർ അംബലവന്‍ നന്ദിയും പറഞ്ഞു.