കാഞ്ഞാര്‍: അറക്കുളം, മൂലമറ്റം, കാഞ്ഞാര്‍ പ്രദേശങ്ങളില്‍ ഉണ്ടായ കാറ്റിലും മഴയിലും ഇടിമിന്നലിലും വ്യാപക നാശനഷ്ടം.
മൂലമറ്റം ബിഷപ്പ് വയലില്‍ ആശുപത്രിക്ക് സമീപമുള്ള ഡോക്ടര്‍മാരുടെ കോര്‍ട്ടേഴ്‌സില്‍ ഫ്രിഡ്ജിനു മുകളിലിരുന്ന സ്റ്റെബിലൈസറിനു മിന്നലേറ്റ് ഷോര്‍ട്ട് സര്‍ക്യൂട്ട് മൂലം തീപിടിച്ചു. മൂലമറ്റത്ത് നിന്നു ഫയര്‍ഫോഴ്‌സ് എത്തി തീയണച്ചു. തീ പെട്ടന്ന് അണക്കാന്‍ ആയതിനാല്‍ വന്‍ദുരന്തം ഒഴിവായി.
കാഞ്ഞാര്‍ ചേനപ്പറമ്പില്‍ സി.എസ്. ഗോപിനാഥിന്റെ വീടിന് മുകളിലേക്ക് കൂറ്റന്‍ പ്ലാവ് ഒടിഞ്ഞു വീണു. വീടിന്റെ കാര്‍പോര്‍ച്ചും കാറും തകര്‍ന്നു. പുതിയ ഫോര്‍ഡ് എക്കോസ്‌പോര്‍ട് കാറാണ് തകര്‍ന്നത്. മൂലമറ്റം പതിപ്പള്ളി പേരിയത്ത് ബിജുവിന്റെ വീടിന് ഇടിമിന്നലേറ്റ് വാര്‍ക്ക പൊളിഞ്ഞു വീണു. വലിയ ശബ്ദത്തോടെ ഒരു മണിക്കൂറോളം നീണ്ടു നിന്ന ഇടിമിന്നലില്‍ നിരവധി വീടുകള്‍ക്കും വൈദ്യുതി ഉപകരണങ്ങള്‍ക്കും തകരാറുണ്ടായി.