ജയ്പൂര്‍: രാജസ്ഥാന്‍ കോണ്‍ഗ്രസ് സര്‍ക്കാരിലുണ്ടായ ചേരിതിരിവ് ഉരുകിയതോടെ അധികാരം മോഹിച്ചിരുന്ന ബി.ജെ.പി അവസാന ശ്രമമെന്ന നിലയ്ക്ക് അവിശ്വാസ പ്രമേയവുമായി രംഗത്ത്. എന്നാല്‍ വിശ്വാസ വോട്ടെടുപ്പ് നടത്തുമെന്ന പ്രഖ്യാപനവുമായി കോണ്‍ഗ്രസും പിന്നാലെ രംഗത്തെത്തി.

മുഖ്യമന്ത്രി വിശ്വാസ പ്രമേയം കൊണ്ടുവന്നാല്‍ സ്വാഭാവികമായും മറ്റൊരു അംഗം കൊണ്ടുവരുന്ന അവിശ്വാസ പ്രമേയം റദ്ദാവുമെന്നാണ് നിയമസഭാ റൂള്‍സ്.

നേരത്തെ തന്നെ വിശ്വാസ വോട്ടെടുപ്പ് മുഖ്യമന്ത്രി അശോക് ഗെലോട്ട് ഒരുങ്ങിയിരുന്നു. സച്ചിന്‍ പൈലറ്റും കൂടെയുള്ള എം.എല്‍.എമാരും പുറത്തുള്ളപ്പോള്‍ 102
എം.എല്‍.എമാരുടെ പിന്തുണ മാത്രമാണ് ഗെലോട്ടിനുണ്ടായിരുന്നത്. അപ്പോഴും ഗെലോട്ട് വിശ്വാസ പ്രമേയത്തിന് ഒരുങ്ങിയിരുന്നുവെങ്കിലും നിയമസഭ ചേരാന്‍ ഗവര്‍ണര്‍ അനുമതി നല്‍കിയിരുന്നില്ല.