കണ്ണൂര്‍: വികസ്വര രാജ്യങ്ങള്‍ക്കു ഗുണമേന്മയുള്ള ഔഷധം വിതരണം ചെയ്യുന്ന രാജ്യം എന്നതില്‍ നിന്ന് ഇന്ത്യ പിറകോട്ടുപോയത് ലോകാരോഗ്യ രംഗത്ത് ഗുരുതരമായ പ്രതിസന്ധിയാണു സൃഷ്ടിക്കുന്നതെന്നു ഡോ. ബി ഇക്ബാല്‍. ശാ
സ്ത്രസാഹിത്യ പരിഷത്ത് സംസ്ഥാന സമ്മേളനത്തില്‍ അല്‍മാട്ടാ മുതല്‍ സാര്‍വത്രിക ആരോഗ്യ സേവനം എന്ന വിഷയത്തില്‍ ഡോ. ഹാല്‍ഫ്ഡന്‍ മാലര്‍ അനുസ്മരണം നടത്തുകയായിരുന്നു അദ്ദേഹം. ആരോഗ്യമേഖല സേവനം എന്നതില്‍ നിന്നു വ്യവസായം എന്ന നിലയിലേക്കു മാറുന്നു. പ്രാഥമികാരോഗ്യ കേന്ദ്രങ്ങളെ മെച്ചപ്പെടുത്തുക എന്നതിനായിരുന്നു അല്‍മാട്ടാ സമ്മേളനം പ്രാമുഖ്യം നല്‍കിയത്. വ്യത്യസ്ത ആശയഗതിയുള്ള 150 രാജ്യങ്ങളിലെ പ്രതിനിധികളെ കൊണ്ട് ഇത് അംഗീകരിപ്പിക്കുന്നതില്‍ ഡോ. ഹാല്‍ഫ്ഡന്‍ മാലര്‍ വഹിച്ച പങ്ക് വലുതാണ്.
രണ്ടുവര്‍ഷം കൂടുമ്പോള്‍ അവശ്യമരുന്നുകളുടെ പട്ടിക പ്രസിദ്ധീകരിക്കണമെന്ന തീരുമാനം ബഹുരാഷ്ട്ര കമ്പനികളെ ക്ഷുഭിതരാക്കിയിരിയിരുന്നു. പ്രാഥമികാരോഗ്യ മേഖല മെച്ചപ്പെടുത്തുകയെന്നത് ആരോഗ്യരംഗം മാത്രം മെച്ചമായാല്‍ സാധിക്കില്ല. വിദ്യാഭ്യാസം, സംസ്‌കാരം, തൊഴില്‍ എന്നിവയെല്ലാം ബന്ധപ്പെടുത്തിയായിരിക്കണം ആരോഗ്യ മേഖലയെ മെച്ചപ്പെടുത്താന്‍. സാമൂഹിക നീതി എന്നതില്‍ അധിഷ്ഠിതമാകാതെ ഈ മേഖലയ്ക്കും മുന്നോട്ടുപോകാന്‍ സാധിക്കില്ലെന്നും ഇഖ്ബാല്‍ വ്യക്തമാക്കി. ഡോ. എസ് മിഥുന്‍ അധ്യക്ഷനായി. വി.ടി നാസര്‍ സംസാരിച്ചു.