കൊല്‍ക്കത്ത: ഐ.പി.എല്ലില്‍ കൊല്‍ക്കത്തക്കെതിരായ മത്സരത്തില്‍ ബാംഗ്ലൂരിന് പത്ത് റണ്‍സ് വിജയം. ആദ്യം ബാറ്റ് ചെയ്ത ബാംഗ്ലൂര്‍ ഉയര്‍ത്തിയ 214 റണ്‍സ് വിജയലക്ഷ്യം പിന്തുടര്‍ന്ന കൊല്‍ക്കത്തക്ക് 20 ഓവറില്‍ അഞ്ച് വിക്കറ്റ് നഷ്ടത്തില്‍ 203 റണ്‍സെടുക്കാനെ കഴിഞ്ഞുള്ളൂ. കൊല്‍ക്കത്തക്ക് വേണ്ടി നിഥീഷ് റാണ (46 പന്തില്‍ പുറത്താവാതെ 85) ആേ്രന്ദ റസ്സല്‍ (25 പന്തില്‍ 65) എന്നിവര്‍ മികച്ച പ്രകടനം പുറത്തെടുത്തെങ്കിലും വിജയം മാത്രം അകന്നുനിന്നു. ബാംഗ്ലൂരിനായി ഡെയ്ല്‍ സ്റ്റെയ്ന്‍ രണ്ട് വിക്കറ്റ് വീഴ്ത്തി. നേരത്തെ ആദ്യം ബാറ്റ് ചെയ്ത ബാംഗ്ലൂര്‍ ക്യാപ്റ്റന്‍ കോഹ്‌ലിയുടെ മികവിലാണ് മികച്ച സ്‌കോര്‍ നേടിയത്. 58 പന്തില്‍ നിന്ന് 100 റണ്‍സ് നേടിയ കോഹ്‌ലിയുടെ പ്രകടനത്തോടെ ബാംഗ്ലൂര്‍ 20 ഓവറില്‍ നാല് വിക്കറ്റ് നഷ്ടപ്പെടുത്തി 213 റണ്‍സ് നേടി.

ടോസ് നേടിയ കൊല്‍ക്കത്ത ബാംഗ്ലൂരിനെ ബാറ്റിങ്ങിനയക്കുകയായിരുന്നു. പാര്‍ഥിവിനെയും അക്ഷദീപ് നാഥിനെയും തുടക്കത്തില്‍ത്തന്നെ നഷ്ടമായെങ്കിലും മൂന്നാം വിക്കറ്റില്‍ ഒത്തുചേര്‍ന്ന കോഹ്‌ലി-മോയിന്‍ അലി സഖ്യം നൈറ്റ് റൈഡേഴ്‌സ് ബൗളര്‍മാരെ നിലംതൊടാതെ പറത്തിക്കുന്ന കാഴ്ചയ്ക്കാണ് ഈഡന്‍ ഗാര്‍ഡന്‍ സാക്ഷ്യം വഹിച്ചത്. മൂന്നാം വിക്കറ്റില്‍ ഇരുവരും 90 റണ്‍സാണ് ചേര്‍ത്തത്.അഞ്ചു ഫോറിന്റെയും ആറ് സിക്‌സിന്റെയും അകമ്പടിയോടെ 28 പന്തില്‍ 66 റണ്‍സെടുത്ത മോയിന്‍ അലിയെ കുല്‍ദീപ് പ്രസീദിന്റെ കൈകളിലെത്തിക്കുകയായിരുന്നു. കുല്‍ദീപ് എറിഞ്ഞ 16ാം ഓവറില്‍ മൂന്നുംസിക്‌സും രണ്ടു ഫോറും ഉള്‍പ്പെടെ 27 റണ്‍സാണ് അലി നേടിയത്. മോയിന്‍ അലി പുറത്തായതിനു ശേഷം ആക്രമണത്തിന്റെ ദൗത്യം ഏറ്റെടുത്ത ക്യാപ്റ്റന്‍ കോഹ്‌ലി ടീമിനെ മികച്ച സ്‌കോറിലെത്തിക്കുകയായിരുന്നു. 40 പന്തില്‍ നിന്ന് അര്‍ധ സെഞ്ചുറി പിന്നിട്ട കോഹ്‌ലി അടുത്ത 50 റണ്‍സ് നേടിയത് വെറും പതിനെട്ടു പന്തില്‍നിന്നാണ്. ഇതോടെ ഐ.പി.എല്ലില്‍ അഞ്ചാം സെഞ്ചുറി നേട്ടവും കോഹ്‌ലി സ്വന്തമാക്കി. ഒന്‍പത് ഫോറും നാല് സിക്‌സും ഉള്‍പ്പെടുന്നതാണ് കോഹ്‌ലിയുടെ ഇന്നിങ്‌സ്. മാര്‍ക്കസ് സ്റ്റോയ്‌നിസ് 17 റണ്‍സെടുത്തു. കൊല്‍ക്കത്തയ്ക്കു വേണ്ടി റസ്സലും നരൈനും കുല്‍ദീപും ഗുര്‍ണിയും ഓരോ വിക്കറ്റ് വീതം നേടി.