കോട്ടയം: ഇടതുമുന്നണി ഇവന്റ് മാനേജ്‌മെന്റ് ഗ്രൂപ്പിനെ ഉപയോഗിച്ച് പണം വിതരണം ചെയ്യുന്നുവെന്ന കോണ്‍ഗ്രസ് നേതാക്കളുടെ ആരോപണം കോഴിക്കോട്ടെ യു.ഡി.എഫ് സ്ഥാനാര്‍ഥിക്കെതിരായ ഒളികാമറാ വിവാദം മറച്ചുവയ്ക്കാനാണെന്ന് സി.പി.എം കേന്ദ്ര കമ്മിറ്റിയംഗം വൈക്കം വിശ്വന്‍.

കെ.എം മാണിക്ക് താല്‍പര്യമില്ലാത്തയാളെ സമ്മര്‍ദതന്ത്രം ഉപയോഗിച്ച് കോട്ടയത്ത് സ്ഥാനാര്‍ഥിയാക്കിയെന്ന ആക്ഷേപം അവര്‍ക്കിടയില്‍ ശക്തമാണെന്ന് ചോദ്യത്തിന് മറുപടിയായി അദ്ദേഹം പറഞ്ഞു. കോട്ടയം പ്രസ് ക്ലബില്‍ സംഘടിപ്പിച്ച 'ബാറ്റില്‍-2019' മുഖാമുഖം പരിപാടിയില്‍ സംസാരിക്കുകയായിരുന്നു വൈക്കം വിശ്വന്‍.
എല്‍.ഡി.എഫിനുവേണ്ടി പതിനായിരക്കണക്കിന് പ്രവര്‍ത്തകരാണ് തെരഞ്ഞെടുപ്പ് പ്രവര്‍ത്തനത്തില്‍ പങ്കാളികളാകുന്നത്. ഒരു ഇവന്റ് മാനേജ്‌മെന്റ് ഗ്രൂപ്പിന്റെയും ആവശ്യം ഞങ്ങള്‍ക്കില്ല. എന്നാല്‍ കോട്ടയത്ത് അടക്കം യു.ഡി.എഫിനുവേണ്ടി പ്രചാരണം നടത്തുന്നത് ആരാണെന്ന് ഉമ്മന്‍ചാണ്ടി വ്യക്തമാക്കണം. ആരൊക്കെയോ നടത്തുന്ന പ്രവര്‍ത്തനത്തിനു മുന്നില്‍ കയറിനിന്ന് അത് ഞങ്ങളാണെന്ന് പറയുകയാണ് യു.ഡി.എഫ്. ഓടുന്ന പട്ടിക്ക് ഒരുമുഴം മുന്‍പേ എന്ന മട്ടില്‍ സ്വന്തം മുന്നണിയില്‍ നടക്കുന്ന കാര്യം മറ്റുള്ളവരുടെ മേല്‍ പഴിചാരുന്ന തന്ത്രമാണ് പയറ്റുന്നത്.

മാണിയുടെ നിര്യാണത്തെത്തുടര്‍ന്ന് യു.ഡി.എഫിന് അനുകൂലമായ ഒരു തരംഗവും ഉണ്ടാകില്ല. കാരണം മാണിക്ക് താല്‍പര്യമില്ലാത്തയാളെയാണ് സ്ഥനാര്‍ഥിയാക്കിയതെന്ന് അവര്‍ക്കിടയില്‍ തന്നെ ചര്‍ച്ച സജീവമാണ്. പി.ജെ ജോസഫിനെ മത്സരിപ്പിക്കാനായിരുന്നു മാണി ആഗ്രഹിച്ചിരുന്നത്. എന്നാല്‍ ചിലര്‍ അവസാന നിമിഷം നിര്‍ബന്ധിച്ച് തീരുമാനം എടുപ്പിക്കുകയായിരുന്നുവെന്നും അദ്ദേഹം പറഞ്ഞു.