കല്‍പ്പറ്റ: എ.ഐ.സി.സി ജനറല്‍ സെക്രട്ടറി പ്രിയങ്ക ഗാന്ധി, കേന്ദ്ര മന്ത്രി സ്മൃതി ഇറാനി എന്നിവര്‍ വയനാട്ടിലേക്ക്. വയനാട്ടിലെ വിവിധ തെരഞ്ഞെടുപ്പ് പൊതുയോഗങ്ങളിലാണ് ഇരുവരും പ്രചാരണം നടത്തുക.

രാവിലെ 10.25ന് മാനന്തവാടി വള്ളിയൂര്‍ക്കാവില്‍ ഹെലികോപ്ടറിറങ്ങുന്ന പ്രിയങ്ക അവിടെ പൊതുയോഗത്തില്‍ സംസാരിക്കും. തുടര്‍ന്ന് 11.05ന് മുട്ടിലിലേക്ക് തിരിക്കും. 11.45ന് മുട്ടില്‍ ഡബ്ല്യു.എം.ഒ ആര്‍ട്‌സ് ആന്റ് സയന്‍സ് കോളജ് ഗ്രൗണ്ടിലെ ഹെലിപാഡിലിറങ്ങും. തുടര്‍ന്ന് പുല്‍വാമയിലെ ഭീകരാക്രമണത്തില്‍ വീരമൃത്യു വരിച്ച ഹവില്‍ദാര്‍ വി.വി വസന്തകുമാറിന്റെ കുടുംബത്തെ സന്ദര്‍ശിക്കും. റോഡ് മാര്‍ഗമാണ് തൃക്കൈപ്പറ്റയിലെ വാഴക്കണ്ടി കോളനിയിലെ കുടുംബ വീട്ടിലെത്തുക. തുടര്‍ന്ന് കുടുംബവുമായി കൂടിക്കാഴ്ച. റോഡ് മാര്‍ഗം തന്നെ മുട്ടില്‍ കോളജ് ഗ്രൗണ്ടിലെ ഹെലിപാഡില്‍ തിരിച്ചെത്തി 1.30ഓടെ പുല്‍പ്പള്ളിയിലേക്ക് പോകും. ഇവിടെ കര്‍ഷക സംഗമത്തില്‍ പങ്കെടുത്ത ശേഷം നിലമ്പൂരിലേക്ക്. അതിനുശേഷം അരീക്കോട്ടെ പരിപാടിയില്‍ പങ്കെടുത്ത് വൈത്തിരിയിലേക്ക് പോകും. രാത്രി ഇവിടെ തങ്ങുന്ന പ്രിയങ്ക നാളെ കരിപ്പൂരില്‍ നിന്ന് ഡല്‍ഹിയിലേക്ക് മടങ്ങും.

കേന്ദ്ര മന്ത്രി സ്മൃതി ഇറാനി നാളെയാണ് എന്‍.ഡി.എ സ്ഥാനാര്‍ഥി തുഷാര്‍ വെള്ളാപ്പള്ളിയുടെ പ്രചാരണത്തിന് എത്തുക. രാവിലെ 9.30ന് സുല്‍ത്താന്‍ ബത്തേരി സെന്റ് മേരീസ് കോളജ് ഗ്രൗണ്ട് ഹെലിപാഡില്‍ ഇറങ്ങുന്ന അവര്‍ 9.50ന് ഗാന്ധി ജംഗ്ഷനില്‍ സംസാരിക്കും.