ന്യൂഡല്‍ഹി: ഡല്‍ഹി ഉപമുഖ്യമന്ത്രി മനീഷ് സിസോദിയ നിയമസഭാംഗം എന്ന നിലയില്‍ സാമ്പത്തിക നേട്ടമുള്ള മറ്റൈാരു പദവി കൈകാര്യം ചെയ്യുന്നുവെന്ന് ആരോപിച്ച് ബി.ജെ.പി നല്‍കിയ പരാതി തെരഞ്ഞടുപ്പ് കമ്മിഷന്‍ തള്ളി.
സിസോദിയ ഉപമുഖ്യമന്ത്രി എന്ന നിലയില്‍ സാമ്പത്തിക നേട്ടം ഉണ്ടാക്കുന്നുണ്ടെന്നും അതിനാല്‍ അദ്ദേഹത്തെ അയോഗ്യനാക്കണമെന്നുമായിരുന്നു ബി.ജെ.പി നേതാവ് വിവേക് ഗാര്‍കിന്റെ പരാതി. സിസോദിയയെ അയോഗ്യനാക്കണമെന്ന് ആവശ്യപ്പെട്ട് രാഷ്ട്രപതി പ്രണബ് മുഖര്‍ജിക്ക് പരാതി നല്‍കിയിരുന്നു.
എന്നാല്‍ വിവിധ സംസ്ഥാനങ്ങളില്‍ ഉപമുഖ്യമന്ത്രി പദവിയുണ്ട്. ഇത് സാമ്പത്തിക നേട്ടമുള്ള പദവിയായി കണക്കാക്കാനാവില്ലെന്ന് തെരഞ്ഞടുപ്പ് കമ്മിഷന്‍ വ്യക്തമാക്കി. ഇക്കാര്യം കമ്മിഷന്‍ രാഷ്ട്രപതിയെ അറിയിച്ചിട്ടുണ്ട്.
നേരത്തെ 21 എ.എ.പി എം.എല്‍.എമാരെ പാര്‍ലമെന്ററി സെക്രട്ടറിമാരായി നിയമിച്ചത് ഭരണഘടനാ ലംഘനമാണെന്ന് ആക്ഷേപമുയര്‍ന്നിരുന്നു. ഇത് മറികടക്കാന്‍ ആംആദ്മി സര്‍ക്കാര്‍ കൊണ്ടുവന്ന ബില്‍ രാഷ്ട്രപതി തള്ളിയിരുന്നു.
ഇതേതുടര്‍ന്ന് എം.എല്‍.എമാര്‍ ഇരട്ടപദവി വഹിച്ചെന്ന് ആരോപിച്ച് ഡല്‍ഹി സ്വദേശിയായ പ്രശാന്ത് പട്ടേല്‍ രാഷ്ട്രപതിയ്ക്ക് പരാതി നല്‍കി. രാഷ്ട്രപതി പരാതി തെരഞ്ഞെടുപ്പ് കമ്മിഷന് കൈമാറുകയും കമ്മിഷന്‍ എം.എല്‍.എമാരോട് വിശദീകരണം ചോദിക്കുകയും ചെയ്തതോടെ ഡല്‍ഹി സര്‍ക്കാര്‍ നിയമത്തില്‍ ഭേദഗതി വരുത്തി ബില്‍ കൊണ്ടുവരികയായിരുന്നു.