മലപ്പുറം: ലോക്‌സഭാ തെരഞ്ഞെടുപ്പില്‍ മാവോവാദി സാന്നിധ്യമുള്‍പ്പടെയുള്ള 67 പ്രശ്‌നബാധിത ബൂത്തുകളിലും പ്രത്യേക ആന്റി നക്‌സല്‍ ഫോഴ്‌സ് പ്രവര്‍ത്തിക്കുമെന്ന് നോഡല്‍ ഓഫിസര്‍ അഡീഷണല്‍ എസ്.പി എം. സുബൈര്‍ പറഞ്ഞു. ആന്റി നക്‌സല്‍ ഫോഴ്‌സിന് പുറമെ ആറ് കമ്പനി കേന്ദ്ര സായുധ പൊലിസ് സേനയും ഈ കേന്ദ്രങ്ങളില്‍ സുരക്ഷയ്ക്കായി ഉണ്ടാകും. പ്രശ്‌നബാധിത പ്രദേശങ്ങളിലും ബൂത്തുകളിലുമായി പ്രത്യേക സ്‌കീം പ്രകാരമാണ് സുരക്ഷ ഒരുക്കുന്നത്.
തെരഞ്ഞെടുപ്പിനോടനുബന്ധിച്ച് സുരക്ഷാ ക്രമീകരണങ്ങളുടെ ഭാഗമായി എല്ലാ പൊലിസ് സ്റ്റേഷനുകളിലും ഇന്‍സ്‌പെക്ടര്‍ റാങ്കിലുള്ള ഉദ്യോഗസ്ഥരെയാണ് നിയമിച്ചിട്ടുള്ളത്.
മലപ്പുറം, പൊന്നാനി, വയനാട് ലോക്‌സഭ മണ്ഡലങ്ങളിലായി ക്രമീകരിച്ചിട്ടുള്ള 2,750 ബൂത്തുകളിലെ സുരക്ഷാ ചുമതലകള്‍ നിര്‍വഹിക്കുന്നതിനായി 1,250 പ്രത്യേകം പൊലിസ് ഓഫിസര്‍മാരെയാണ് നിയോഗിച്ചിട്ടുള്ളത്. കൂടാതെ 67 പ്രശ്‌ന ബാധിത ബൂത്തുകള്‍ 37 പ്രശ്‌നബാധിത പ്രദേശങ്ങള്‍ എന്നിവിടങ്ങളിലേക്കായി ആറ് കമ്പനി കേന്ദ്ര സായുധ സേനയും കൂടാതെ ഇതരസംസ്ഥാനങ്ങളില്‍നിന്നുള്ള സേനയും സുരക്ഷക്കായി ഉണ്ടാകും. എല്ലാ പോളിങ് ബൂത്തുകളിലും ഗ്രൂപ്പ് പെട്രോളിങ് നടത്തുന്നതിനായി 170 ഗ്രൂപ്പുകളെ വീഡിയോ കവറേജിങ് ഉള്‍പ്പടെയുള്ള സംവിധാനങ്ങളോടെ സജ്ജമാക്കിയിട്ടുണ്ട്.