അടിമാലി: കോണ്‍ഗ്രസ് ദേശീയ അധ്യക്ഷന്‍ രാഹുല്‍ ഗാന്ധി വയനാട്ടില്‍ മത്സരിക്കാനെത്തിയതിലൂടെ ഇടുക്കിക്കും സുവര്‍ണാവസരമാണ് ലഭിച്ചിട്ടുള്ളതെന്ന് മുന്‍ മുഖ്യമന്ത്രി ഉമ്മന്‍ചാണ്ടി.അടിമാലിയില്‍ യു.ഡി.എഫ് സ്ഥാനാര്‍ഥി ഡീന്‍ കുര്യാക്കോസിന്റെ തെരഞ്ഞെടുപ്പ് പ്രചാരണ പൊതുസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വയനാടിനും ഇടുക്കിക്കും സമാന സാഹചര്യമാണുള്ളത്. രാഹുല്‍ ഗാന്ധിയിലൂടെ വയനാടിന്റെ പ്രശ്‌നങ്ങള്‍ പരിഹരിക്കപ്പെടുമ്പോള്‍ രാഹുല്‍ ഗാന്ധിക്കൊപ്പം ചേര്‍ന്ന്് ഡീന്‍ കുര്യാക്കോസിന് ഇടുക്കിയുടെ പ്രശ്‌നങ്ങളും പരിഹാരിക്കാനാകും. ലോക്‌സഭ തെരഞ്ഞെടുപ്പ് പിണറായി സര്‍ക്കാരിനുള്ള താക്കീതായി മാറാണം. മോദി സര്‍ക്കാര്‍ കഴിഞ്ഞ 5 വര്‍ഷക്കാലമായി രാജ്യത്തെ പാവപ്പെട്ട ജനങ്ങളെ ദ്രോഹിക്കുകയാണെന്നും ഉമ്മന്‍ചാണ്ടി കുറ്റപ്പെടുത്തി. പരസ്യപ്രചാരണം അവസാനിക്കാന്‍ മണിക്കൂറുകള്‍ മാത്രം അവശേഷിക്കെ യു.ഡി.എഫ് പ്രവര്‍ത്തകരില്‍ വാനോളം ആവേശം ഉയര്‍ത്തിയാണ് ഉമ്മന്‍ ചാണ്ടി അടിമാലിയില്‍ എത്തിയത്. പൊതുസമ്മേളനത്തില്‍ യു.ഡി.എഫ് ചെയര്‍മാന്‍ എം.ബി സൈനുദ്ദീന്‍ അധ്യക്ഷത വഹിച്ചു. എ.കെ മണി, ഡി.സി.സി പ്രസിഡന്റ് ഇബ്രാഹിംകുട്ടി കല്ലാര്‍, എം.ജെ ജേക്കബ്, കെ.എസ് സിയാദ് ,കെ.എ സിയാമോന്‍, സാബു പരവരാഗത്ത്, കെ.എ കുര്യന്‍ സംസാരിച്ചു.