തിരുവനന്തപുരം: കൊവിഡ് പ്രതിരോധ പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന പൊലിസുകാരെ ഇനി ' കൊവിഡ് പടയാളി ' പതക്കം നല്‍കി ആദരിക്കും. 30 ദിവസം കൊവിഡ് പ്രതിരോധ ഡ്യൂട്ടി ചെയ്ത എല്ലാ റാങ്കിലുമുള്ള ഉദ്യോഗസ്ഥര്‍ക്കും പ്രത്യേക പതക്കം നല്‍കാന്‍ ഡി.ജി.പി ലോക്‌നാഥ് ബെഹ്‌റ ഉത്തരവിറക്കി.
ഉദ്യോഗസ്ഥര്‍ യൂനിഫോമിന്റെ ഇടതു പോക്കറ്റിനു മുകളിലായാണ് പതക്കം ധരിക്കേണ്ടത്. ബഹുമതിക്കായി പരിഗണിക്കേണ്ട ഉദ്യോഗസ്ഥരെ ജില്ലാ പൊലിസ് മേധാവികളും അതത് യൂനിറ്റ് മേധാവിമാരും കണ്ടെത്തണം.
കൊവിഡ് പ്രതിരോധത്തിന്റെ അധിക ഡ്യൂട്ടിയുടെ ഭാഗമായി പൊലിസുകാര്‍ക്കിടയില്‍ രോഗവ്യാപനവും ജോലി ഭാരവും കൂടുന്നത് സേനയിലാകെ ആശങ്കയും അതൃപ്തിയും നിറച്ചതോടെയാണ് ഉദ്യോഗസ്ഥരെ പ്രോത്സാഹിപ്പിക്കാന്‍ ഡി.ജി.പിയുടെ പുതിയ പ്രഖ്യാപനം.