പയ്യോളി: യാത്രക്കാരന്‍ അറിയാതെ വിദേശത്തേക്ക് കഞ്ചാവ് കൊടുത്തയക്കാന്‍ ശ്രമിച്ച സംഭവത്തില്‍ രണ്ടുപേര്‍കൂടി പൊലിസ് പിടിയിലായി. തുറയൂര്‍ സ്വദേശികളായ ഒടിയില്‍ മുഹമ്മദ് (21), മരക്കാട്ട്കുനി നിഹാല്‍ (21) എന്നിവരെയാണ് അറസ്റ്റ് ചെയ്തത്.
സംഭവവുമായി ബന്ധപ്പെട്ട് തുറയൂര്‍ മണപ്പുറത്ത് താഴെ ഷറഫുദ്ദീന്‍ (20) നേരത്തെ അറസ്റ്റിലായിരുന്നു. ഷറഫുദ്ദീന് കഞ്ചാവ് എത്തിച്ചുനല്‍കിയതിനാണ് മറ്റു രണ്ടുപേര്‍ പിടിയിലായത്. ഇവര്‍ മൂന്നുപേര്‍ ചേര്‍ന്നാണ് സിഗരറ്റില്‍ കഞ്ചാവ് നിറച്ചതെന്ന് പൊലിസ് പറഞ്ഞു. കഴിഞ്ഞ 27നായിരുന്നു സംഭവം. ദുബൈയിലേക്ക് പോവുകയായിരുന്ന കൊവ്വുമ്മല്‍ സ്വദേശി സാദിഖിന്റെ വശം സുഹൃത്തിന് നല്‍കാനായി ഷറഫുദ്ദീന്‍ കൊടുത്തയച്ച ജീന്‍സ് പാന്റ് സാദിഖിന്റെ വീട്ടുകാര്‍ പരിശോധിച്ചപ്പോഴാണ് പോക്കറ്റില്‍ നിന്നു ഏഴോളം സിഗരറ്റുകള്‍ ലഭിച്ചത്. ഇവയ്ക്കുള്ളിലാണ് കഞ്ചാവ് ഒളിപ്പിച്ചിരുന്നത്. നാദാപുരം കോടതിയില്‍ ഹാജരാക്കിയ പ്രതികള്‍ക്ക് ജാമ്യം ലഭിച്ചു.