നടുവണ്ണൂര്‍: ഗവ. ഹയര്‍ സെക്കന്‍ഡറി സ്‌കൂളില്‍ എട്ടാം തരത്തിലേക്കുള്ള പ്രവേശനം നാലിന് നടക്കാനിരിക്കെ മക്കളുടെ പ്രവേശനം ഉറപ്പാക്കാന്‍ രണ്ട് ദിവസം മുന്‍പെ രക്ഷിതാക്കള്‍ ക്യൂവില്‍.
ഇന്നലെ രാവിലെ 10 മുതല്‍ തന്നെ ക്യൂ ആരംഭിച്ചിരുന്നു. മലയാളം മീഡിയത്തില്‍ 150 കുട്ടികള്‍ക്കാണ് പ്രവേശനം നല്‍കുക. എന്നാല്‍ പ്രവേശനം ലഭിക്കാന്‍ ഇന്നലെ ഉച്ചയോടെ 216 രക്ഷിതാക്കള്‍ എത്തിയിരുന്നു. ഇംഗ്ലിഷ് മീഡിയത്തില്‍ 150 കുട്ടികള്‍ക്ക് പ്രവേശനമുള്ളിടത്ത് 264 രക്ഷിതാക്കള്‍ പ്രവേശനം നേടാനെത്തിയിരുന്നു.
സ്‌കൂളിനെ അന്താരാഷ്ട്ര പദവിയിലേക്കുയര്‍ത്തുന്നതിന്റ ഭാഗമായാണ് പ്രവേശനത്തിനു തിരക്കനുഭവപ്പെടുന്നതെന്ന് കരുതുന്നു.
എന്നാല്‍ ഒരു സ്‌പെഷല്‍ ഓര്‍ഡറിലൂടെ എട്ടാം തരത്തില്‍ മൂന്ന് ഡിവിഷനുകള്‍ അനുവദിച്ചാല്‍ 150 കുട്ടികള്‍ക്കുകൂടി പ്രവേശനം നല്‍കാന്‍ കഴിയുമെന്നും ഇതിനുള്ള ശ്രമം നടത്തുകയാണെന്നും സ്‌കൂള്‍ അധികൃതര്‍ പറഞ്ഞു.