കാക്കനാട്: ജില്ല ഭരണകൂടം അന്‍പോട് കൊച്ചി ഫേസ്ബുക്ക് കൂട്ടായ്മയുമായി സഹകരിച്ച് നടപ്പിലാക്കുന്ന 'പഠിക്കാം പഠിപ്പിക്കാം' പദ്ധതിയിലെ 25 കുട്ടികളുടെ വിദ്യാഭ്യാസ ചെലവ് ഏറ്റെടുത്ത് ലയണ്‍സ് ക്ലബ് മാതൃകയായി. ഇതോടനുബന്ധിച്ച് കാക്കനാട് ലയണ്‍സ് ക്ലബിന്റെ കര്‍മ്മ പദ്ധതികള്‍ ജില്ലാ കലക്ടര്‍ എം.ജി രാജമാണിക്യം ഉദ്ഘാടനം ചെയ്തു.
ക്ലബ് പ്രസിഡന്റ് സനല്‍ പോറ്റി അധ്യക്ഷതവഹിച്ചു. വിവിധ സ്‌കൂളുകളില്‍ നടപ്പിലാക്കുന്ന ലൈബ്രറികളുടെ ഉദ്ഘാടനം കുട്ടികളുടെ കൂട്ടായ്മയായ ലിയോ ക്ലബ് പ്രസിഡന്റ് ധ്വാനി എം.എസ്. പോറ്റിയില്‍ നിന്ന് പുസ്തകങ്ങള്‍ സ്വീകരിച്ച് നഗരസഭാ ചെയര്‍പേഴ്‌സണ്‍ കെ.കെ. നീനു നിര്‍വഹിച്ചു. മുന്‍ ലയണ്‍സ് ക്ലബ് ഗവര്‍ണ്ണര്‍ റോയ് വര്‍ഗീസ്, പ്രോജക്ട് കോര്‍ഡിനേറ്റര്‍മാരായ പി. ശ്രീരാജ്, ജിജോ ജേക്കബ്, വിജികുമാര്‍, നഗരസഭാ വൈസ് ചെയര്‍മാന്‍ സാബു ഫ്രാന്‍സിസ്, ലയണ്‍സ് ക്ലബ് ഭാരവാഹികളായ പി.ഒ. ജോണ്‍, എം.വി. ജോര്‍ജ്ജ്, ക്ലബ് സെക്രട്ടറി ഇ. ശ്രീകുമാര്‍ തുടങ്ങിയവര്‍ സംസാരിച്ചു.