കോട്ടയം : സമഗ്ര ആരോഗ്യ പദ്ധതി (ആര്‍ എസ് ബിവൈ) സംബന്ധിച്ച പരാതികള്‍ പരിഹരിക്കുന്നതിനുള്ള ജില്ലാതല യോഗം ജില്ലാ കളക്ടര്‍ സി.എ. ലതയുടെ അദ്ധ്യക്ഷതയില്‍ ചേര്‍ന്നു. നിലവില്‍ ജില്ലയിലെ വിവിധ ആശുപത്രികളില്‍ നിന്ന് ലഭിച്ച 608 ഇന്‍ഷുറന്‍സ് ക്ലെയിമുകളിലായി 27,08,790 രൂപയുടെ ക്ലെയിമുകള്‍ അനുവദിച്ചു. ഇതില്‍ 25,43,765 രൂപ 30 ദിവസത്തിനുള്ളില്‍ നല്‍കാന്‍ ഇന്‍ഷുറന്‍സ് കമ്പനിക്ക് നിര്‍ദ്ദേശം നല്‍കിയിട്ടുണ്ട്.
പാലാ, കോട്ടയം, ചങ്ങനാശ്ശേരി ജനറല്‍ ആശുപത്രികള്‍, പാമ്പാടി താലൂക്ക് ആശുപത്രി, വാസന്‍ ഐ കെയര്‍, വൈക്കം വി.എസ്.എം. ഹോസ്പിറ്റല്‍, മുക്കൂട്ടുതുറ അസീസി ഹോസ്പിറ്റല്‍, പാലാ ചെറുപുഷ്പം ആശുപത്രി എന്നീ ആശുപത്രികളുടെ ഐ.സി.ഐ.സി ഇന്‍ഷുറന്‍സ് കമ്പനി നല്‍കേണ്ട ക്ലെയിമുകളാണ് പരിശോധിച്ചത്.
പ്രോജക്ട് മാനേജര്‍ ലിബിന്‍ കുര്യാക്കോസ്, ഡോ. സുരേഷ് കെ.ജി, ഐസിഐസി മാനേജര്‍ ശരത് ശങ്കര്‍, ആശുപത്രി പിആര്‍ഒമാര്‍ തുടങ്ങിയവര്‍ പങ്കെടുത്തു.