തുറവൂര്‍: കോടംതുരുത്ത് പഞ്ചായത്തിലെ ചങ്ങരം പാടശേഖരം പച്ചപ്പട്ടണിയാന്‍ ഒരുങ്ങുന്നു. സര്‍ക്കാര്‍ നയമായ ഒരു നെല്ലും മീനും പദ്ധതിയുടെ ഭാഗമായി 42 ഏക്കര്‍ വരുന്ന തെക്കേ ചങ്ങരം പാടശേഖരത്തിലാണ് നെല്‍കൃഷി നടത്തുന്നത്. ചെട്ടി വിരിപ്പ് കൃഷിയാണ്.
കുട്ടനാട്ടില്‍നിന്നും നാല് ട്രാക്ടര്‍ എത്തിച്ചാണ് നിലം ഉഴുത് ഒരുക്കുന്നത്. വഞ്ചിയില്‍ ചങ്ങാടംഘടിപ്പിച്ചാണ് ട്രാക്ടറുകള്‍ പാടശേഖരത്തില്‍ എത്തിച്ചത്.
നെല്‍വിത്തുകള്‍ വിതയ്ക്കുന്ന രീതി ഉപേക്ഷിച്ച് യന്ത്ര സംവിധാനത്താല്‍ നെല്‍ച്ചെടികള്‍ നട്ടുപിടിപ്പിക്കും. ഇതിനുള്ള ട്രാന്‍സ്പ്ലാന്റേഷന്‍ മെഷിന്‍ തൃശൂരില്‍ നിന്നാണ് കൊണ്ടുവരുന്നത്. പാടശേഖരത്തിന്റെ പുറംചിറയില്‍ ജൈവള പ്രയോഗത്തോടെ പ്ലാസ്റ്റിക് ഷീറ്റുകളില്‍ വിത്തുകള്‍ പാകും.
നെല്‍ചെടികള്‍ക്ക് ഇരുപത് ദിവസം പ്രായമാകുമ്പോള്‍ യന്ത്രം ഉപയോഗിച്ച് നെല്‍ച്ചെടികള്‍ നട്ടുപിടിപ്പിക്കും. മൂന്നാഴ്ച പ്രായമാകുമ്പോള്‍ ജൈവള പ്രയോഗം നടത്തും.
അരൂര്‍ മണ്ഡലത്തിലെ പാടശേഖരങ്ങളില്‍ ആദ്യമായിട്ടാണ് ചങ്ങരം പാടത്ത് നെല്‍ച്ചെടി നടീല്‍ യന്ത്രം ഉപയോഗിക്കുന്നത്. കഴിഞ്ഞവര്‍ഷം ഇവിടെ നെല്‍കൃഷിക്കുള്ള ഒരുക്കം ആരംഭിച്ചപ്പോള്‍ മടവീഴ്ച ഉണ്ടായതിനെ തുടര്‍ന്ന് കൃഷി ഉപേക്ഷിക്കുകയായിരുന്നു.