ന്യൂഡല്‍ഹി: യുവ വിസ്മയങ്ങളായ റിഷഭ് പന്തും മലയാളി താരം സഞ്ജു സാംസണും ബാറ്റിങ് വെടിക്കെട്ടുമായി കളം നിറഞ്ഞപ്പോള്‍ ഡല്‍ഹി ഡയര്‍ഡെവിള്‍സിന് അനായാസ വിജയം. കൂറ്റന്‍ സ്‌കോറുകള്‍ പിറന്ന പോരാട്ടത്തില്‍ ഗുജറാത്ത് ലയണ്‍സിനെയാണ് ഡല്‍ഹി ഏഴ് വിക്കറ്റിന് വീഴ്ത്തിയത്.
ജയത്തോടെ ഡല്‍ഹി പ്ലേയോഫ് പ്രതീക്ഷ കാത്തപ്പോള്‍ ഗുജറാത്തിന്റെ പ്രതീക്ഷകള്‍ ഏതാണ്ട് അവസാനിച്ചു. ആദ്യം ബാറ്റ് ഗുജറാത്ത് 20 ഓവറില്‍ ഏഴ് വിക്കറ്റ് നഷ്ടത്തില്‍ 208 റണ്‍സ് അടിച്ചെടുത്തു. മറുപടി പറഞ്ഞ ഡല്‍ഹി വെറും 17.3 ഓവറില്‍ മൂന്ന് വിക്കറ്റ് നഷ്ടത്തില്‍ 214 റണ്‍സടിച്ചാണ് നിര്‍ണായക വിജയം പിടിച്ചത്.
209 വിജയ ലക്ഷ്യത്തിലേക്ക് ബാറ്റേന്തിയ ഡല്‍ഹിക്കായി റിഷഭ് പന്ത് 43 പന്തില്‍ 97 റണ്‍സും സഞ്ജു 31 പന്തില്‍ 61 റണ്‍സും വാരി. റിഷഭ് പന്ത് ആറ് ഫോറും ഒന്‍പത് സിക്‌സും തൂക്കിയപ്പോള്‍ സഞ്ജു ഏഴ് സിക്‌സുകളാണ് പറത്തിയത്. ഇരുവരും ചേര്‍ന്ന് അക്ഷരാര്‍ഥത്തില്‍ ബാറ്റിങ് വെടികെട്ടിനാണ് ഫിറോസ് ഷാ കോട്‌ലയില്‍ തിരികൊളുത്തിയത്. പിന്നീട് ക്രീസിലെത്തിയ ആന്‍ഡേഴ്‌സന്‍ 18ഉം ശ്രേയസ് അയ്യര്‍ 12ഉം റണ്‍സെടുത്ത് വിജയം ഉറപ്പാക്കി.
ടോസ് നേടി ഡല്‍ഹി ബൗളിങ് തിരഞ്ഞെക്കുകയായിരുന്നു. മൂന്നാം വിക്കറ്റില്‍ ഒത്തു ചേര്‍ന്ന നായകന്‍ റെയ്‌നവും വിക്കറ്റ് കീപ്പര്‍ ദിനേഷ് കാര്‍ത്തിക്കും ചേര്‍ന്ന സഖ്യത്തിന്റെ ബാറ്റിങാണ് ഗുജറാത്തിനെ തുണച്ചത്. റെയ്‌ന 43 പന്തില്‍ അഞ്ച് ഫോറും നാല് സിക്‌സും പറത്തി 77 റണ്‍സെടുത്തപ്പോള്‍ കാര്‍ത്തിക്ക് 34 പന്തില്‍ അഞ്ച് വീതം ഫോറും സിക്‌സും പറത്തി 65 റണ്‍സെടുത്തു. വാലറ്റത്ത് ജഡേജ ഏഴ് പന്തില്‍ 18 റണ്‍സെടുത്ത് സ്‌കോര്‍ 200 കടത്തി. ്