മലപ്പുറം: സയ്യിദ് മുഹമ്മദലി ശിഹാബ് തങ്ങളുടെ എട്ടാമത് ഉറൂസ് മുബാറക് ഇന്ന് പാണക്കാട് മഖാമില്‍ നടക്കും. കാലത്ത് പത്തിന് സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ നടക്കുന്ന കൂട്ട സിയാറത്തോടെ പരിപാടികള്‍ക്ക് തുടക്കമാകും. തുടര്‍ന്ന് ഖത്മുല്‍ ഖുര്‍ആന്‍, മൗലിദ് പാരായണം, അനുസ്മരണ പ്രഭാഷണം, എന്നിവ നടക്കും. സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. മികച്ച മുദര്‍രിസിനുള്ള ശിഹാബ് തങ്ങള്‍ സ്മാരക അവാര്‍ഡ് വാക്കോട് മൊയ്തീന്‍ കുട്ടി ഫൈസിക്ക് ഉറൂസില്‍ വച്ച് പാണക്കാട് സയ്യിദ് ഹൈദരലി ശിഹാബ് തങ്ങള്‍ സമ്മാനിക്കും.
സമസ്ത കേരള ജംഇയ്യത്തുല്‍ മുഅല്ലിമീന്‍ ജനറല്‍ സെക്രട്ടറി ഡോ. ബഹാഉദ്ദീന്‍ മുഹമ്മദ് നദ്‌വി, ആനമങ്ങാട് മുഹമ്മദ് കുട്ടി ഫൈസി എന്നിവര്‍ അനുസ്മരണ പ്രഭാഷണം നടത്തും. പാണക്കാട് സയ്യിദ് ബഷീര്‍ അലി ശിഹാബ് തങ്ങള്‍, സയ്യിദ് ബി.എസ്.കെ തങ്ങള്‍ എടവണ്ണപ്പാറ, സയ്യിദ് കെ.കെ.എസ് തങ്ങള്‍ വെട്ടിച്ചിറ, സലീം എടക്കര പ്രസംഗിക്കും.
സമാപന പ്രാര്‍ഥനക്ക് സുന്നി യുവജന സംഘം സംസ്ഥാന ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി നേതൃത്വം നല്‍കും. ളുഹ്ര്‍ ജമാഅത്ത് വരെയുള്ള പരിപാടികള്‍ പാണക്കാട് മഖാമിനോട് ചേര്‍ന്നുള്ള മഹല്ല് ജുമുഅത്ത് പള്ളിയില്‍ വച്ച് നടക്കും. സമസ്തയുടെയും പോഷക ഘടകങ്ങളുടെയും നേതാക്കള്‍, പ്രവര്‍ത്തകര്‍, മഹല്ല് സാരഥികള്‍, ഖത്വീബുമാര്‍ തുടങ്ങിയവരും പൊതുജനങ്ങളും സംബന്ധിക്കും.