കോവളം: മരങ്ങളുടെ ശിഖരങ്ങള്‍ മുറിച്ചുമാറ്റുന്നതിനിടെ മരക്കൊമ്പ് റോഡരികില്‍ പാര്‍ക്ക് ചെയ്തിരുന്ന കാറിന് മുകളില്‍ വീണ് കാറിന്റെ പിന്‍വശത്തെ ഗ്‌ളാസ് തകര്‍ന്നു. മുല്ലൂര്‍ ഉദയഗിരിയില്‍ മോഹനചന്ദ്രന്‍ നായരുടെ കാറിന്റെ ഗ്‌ളാസാണ് തകര്‍ന്നത്.
 ഇന്നലെ ഉച്ചയോടെയായിരുന്നു സംഭവം. കോട്ടുകാല്‍ കെ.എസ്.ഇ.ബി സബ്‌സ്റ്റേഷനിലെ ജീവനക്കാര്‍ ഇലക്ട്രിക് ലൈനിന് മുകളില്‍ നില്‍ക്കുന്ന മരങ്ങളുടെ ശിഖരങ്ങള്‍ വെട്ടിമാറ്റുന്നതിനിടെ താഴെ പാര്‍ക്ക് ചെയ്തിരുന്ന കാറിന് മുകളില്‍ ശിഖരം വീണാണ് അപകടം.
 മുന്‍കരുതലെടുക്കാതെയും വീട്ടുകാരോട് കാര്‍ മാറ്റികൊടുക്കണമെന്നാവശ്യപ്പെടാതെയും അലക്ഷ്യമായി ശിഖരം മുറിച്ചതാണ് അപകട കാരണമെന്ന് ദൃക്‌സാക്ഷികള്‍ പറഞ്ഞു. 7000 രൂപയുടെ നഷ്ടം സംഭവിച്ചതായും കാറിന്റെ ഗ്‌ളാസ് മാറ്റികൊടുക്കാമെന്ന് അസിസ്റ്റന്റ് എന്‍ജിനീയര്‍ അറിയിച്ചതായും കാറിന്റെ ഉടമ പറഞ്ഞു.