ലഖ്‌നൗ: കേന്ദ്രമന്ത്രി സ്മൃതി ഇറാനി മല്‍സരിക്കുന്ന അമേത്തിയില്‍ ഷൂ വിതരണം ചെയ്ത അവരുടെ നടപടിക്കെതിരെ ആഞ്ഞടിച്ച് കോണ്‍ഗ്രസ് ജനറല്‍ സെക്രട്ടറി പ്രിയങ്കാ ഗാന്ധി. സ്മൃതി ഇറാനി അമേത്തിയിലെത്തി ഓരോ വീടുകളിലും കയറി ഷൂ വിതരണം ചെയ്യുകയാണ്. ഇതുകണ്ടാല്‍ അമേത്തിയിലെ ജനങ്ങള്‍ക്ക് ധരിക്കാന്‍ ഷൂ പോലുമില്ലെന്നാണ് കരുതുക. രാഹുല്‍ ഗാന്ധിയെ അപമാനിക്കുകയായിരുന്നു അവരുടെ ലക്ഷ്യമെങ്കിലും സത്യത്തില്‍ അവര്‍ അപമാനിച്ചത് അമേത്തിയിലെ ജനങ്ങളെ തന്നെയാണെന്നും പ്രിയങ്ക പറഞ്ഞു. അമേത്തിയിലേയും റായ്ബറേലിയിലേയും ജനങ്ങള്‍ യാചകരല്ല. ആരു നിങ്ങളെ അപമാനിച്ചാലും അവര്‍ക്ക് തിരിച്ചടി നല്‍കണമെന്നും പ്രിയങ്ക ആവശ്യപ്പെട്ടു. രാഹുലിനു വേണ്ടി അമേത്തിയില്‍ തെരഞ്ഞെടുപ്പു പ്രചാരണ റാലിയില്‍ പങ്കെടുത്തു സംസാരിക്കുകയായിരുന്നു പ്രിയങ്ക. നരേന്ദ്രമോദി അഞ്ചുവര്‍ഷത്തിനിടെ വാരണാസിയിലെ ഒരു ഗ്രാമം പോലും സന്ദര്‍ശിച്ചിട്ടില്ലെന്നും പ്രിയങ്ക കുറ്റപ്പെടുത്തി.
പിന്നാലെ പ്രിയങ്കയുടെ വിമര്‍ശനത്തിനു പ്രതികരണവുമായി സ്മൃതി ഇറാനിയും രംഗത്തുവന്നു. പ്രിയങ്കയുടെ നാടകം അവസാനിപ്പിക്കണമെന്ന് ഇറാനി ആവശ്യപ്പെട്ടു. പ്രിയങ്കയ്ക്ക് അല്‍പ്പമെങ്കിലും നാണമുണ്ടെങ്കില്‍ അമേത്തിയിലെ ജനങ്ങളെ നേരില്‍ കാണണം. അവര്‍ക്ക് ധരിക്കാന്‍ ഷൂവില്ലെന്ന സത്യം കണ്ടറിയണം- ഇറാനി പറഞ്ഞു.