വെള്ളമുണ്ട(വയനാട്): നീണ്ട 23 വര്‍ഷത്തെ പ്രവാസ ജീവിതം അവസാനിപ്പിച്ച് നാട്ടിലെത്തിയ ഇബ്രാഹിമിനിത് കന്നിവോട്ട്. ഒപ്പം മകന്‍ മുഹമ്മദ് റാഫിയും കൂടി കന്നിവോട്ട് ചെയ്യാന്‍ പിതാവിനൊപ്പം കൂടിയതോടെ ഇരുവരുടെയും ആദ്യവോട്ട് അപൂര്‍വത കൂടിയായി.

രണ്ടു പതിറ്റാണ്ടിലേറെയായി പ്രവാസ ജീവിതം നയിക്കുന്ന തേറ്റമല കേളോത്ത് ഇബ്രാഹിമാണ് മകനൊപ്പം കന്നിവോട്ട് ചെയ്തത്. സഊദി അറേബ്യയിലെ റിയാദില്‍ സ്വകാര്യ സ്ഥാപനത്തില്‍ ജോലി ചെയ്തിരുന്ന ഇബ്രാഹിം സാമ്പത്തിക മാന്ദ്യം മൂലം ഗള്‍ഫ് ജീവിതത്തോട് വിട പറത്ത് നാട്ടില്‍ തിരിച്ചെത്തുകയായിരുന്നു. തുടര്‍ന്ന് വോട്ടര്‍ പട്ടികയില്‍ പേര് ചേര്‍ക്കുന്നതിന് വേണ്ടി അപേക്ഷിച്ചു. വോട്ട് ചേര്‍ത്തതോടെ അത് വിനിയോഗിക്കാനുള്ള ആവേശത്തിലായിരുന്നു ഇബ്രാഹിം.

വോട്ട്് രേഖപ്പെടുത്താനുള്ള ആവേശത്തില്‍ അതിരാവിലെ തന്നെ തേറ്റമല ഗവണ്‍മെന്റ് ഹൈസ്‌കൂളിലെ ബൂത്തില്‍ ഇബ്രാഹിമെത്തി. ഇവിടെ ഇബ്രാഹിമിനെ കാത്ത് ബൂത്തിലെ ആദ്യ വോട്ടറെന്ന ഇരട്ടിമധുരം നില്‍പുണ്ടായിരുന്നു. രാഹുലിനെ ഏറെ ഇഷ്ടപ്പെടുന്ന ഇബ്രാഹിമും മകന്‍ മുഹമ്മദ് റാഫിയും കന്നിവോട്ട് തന്നെ രാഹുലിന് ചെയ്യാനായതിന്റെ കൂടി ആവേശത്തിലാണ്.