ജിദ്ദ: ഹജ്ജാജികള്‍ക്ക് രാപ്പകലില്ലാതെ അഞ്ച് ദിവത്തെ സേവനം കഴിഞ്ഞ് മിനായില്‍ നിന്ന് അവസാനത്തെ ഹാജിയെയും കൈപിടിച്ചു ഇറക്കി സേവന പാതയില്‍ നിന്നും മലയാളി വളണ്ടിയര്‍മാര്‍ വിടവാങ്ങി. അയായിരത്തിലേറെ വളണ്ടിയര്‍മാരാണ് അവസാന ദിനം വരെ സേവനത്തിന് മിനായില്‍ എത്തിയത്. ദൈവത്തിന്റെ അതിഥികളെ സേവിക്കാനായതിന്റെ സന്തോഷത്തിലാണ് ഓരോരുത്തരും സഊദിയുടെ വിവിധ ഭാഗങ്ങളിലേ ജോലി സ്ഥലത്തേക്ക് തിരിച്ചത്. .163 രാഷ്ട്രങ്ങളില്‍ നിന്നായി ഇരുപത്തിമൂന്നു ലക്ഷത്തോളം തീര്‍ഥാടകരാണ് ഹജ്ജിനെത്തിയത്. ഇവര്‍ക്ക് പുറമെ വിഖായ, കെ.എം.സി.സി, ഫ്രറ്റേണിറ്റി, രിസാല സ്റ്റഡി സര്‍ക്കിള്‍, ഹജ്ജ് വെല്‍ഫെയര്‍ ഫോറം തുടങ്ങിയ സന്നദ്ധ സംഘടനയുടെ നേതൃത്വത്തിലാണ് സന്നദ്ധ പ്രവര്‍ത്തകര്‍ ഇത്തവണ സേവന രംഗത്തുണ്ടായിരു്ന്നത്. ഹറം, മിനാ, അറഫ എന്നിവിടങ്ങളില്‍ സജീവ സാന്നിധ്യമായിരുന്നു ഇവര്‍. കുട്ടികളും വനിതകളും ഇവര്‍ക്കൊപ്പം സേവനത്തിനെത്തി. 24 മണിക്കൂറും ഷിഫ്റ്റ് അടിസ്ഥാനത്തിലായിരുന്നു സേവനം.
മലയാളി ഹാജിമാര്‍ക്കായി കഞ്ഞിയും അച്ചാറും ഇതര സംസ്ഥാന ഹാജിമാര്‍ക്കായി റൊട്ടിയും പരിപ്പും അവരുടെ ടെന്റുകളില്‍ വിതരണം ചെയ്യാനും ഇവര്‍ക്ക് സാധിച്ചു. വിവിധ സന്നദ്ധ സംഘടനകളുടെ നേതൃത്വത്തില്‍ പതിനായിരത്തിലധികം കഞ്ഞി പാക്കറ്റുകളും അയ്യായിരത്തിലധികം റൊട്ടിയും പരിപ്പ് കറിയുമാണ് നല്‍കിയത് ഹാജിമാര്‍ക്ക് ആശ്വാസം നല്‍കി.
പ്രത്യേകം പരിശീലനം നല്‍കിയ വോളണ്ടിയര്‍മാര്‍ക്കു നൂതന സാങ്കേതിക വിദ്യ പ്രയോജനപ്പെടുത്തി വഴിയറിയാതെ വരുന്ന ഹാജിമാരെ അവരവരുടെ ടെന്റുകളെത്തിക്കാന്‍ സാധിച്ചു. കൂടാതെ ആതുര ശശ്രൂഷ, മയ്യിത്ത് പരിപാലനം, ശാരീരിക അവശതയുള്ള ഹാജിമാരെ ടെന്റുകളില്‍ നിന്ന് കിലോമീറ്ററുകള്‍ വിതൂരതയിലുള്ള ജംറയിലേല്‍ക്കും തിരിച്ചു താമസ സ്ഥലങ്ങളിലേക്കും വീല്‍ ചെയറിലെത്തിക്കുക തുടങ്ങിയ പ്രവര്‍ത്തങ്ങളില്‍ സജീവമായിരുന്നു. അവസാന ദിവസം മിനായില്‍ നിന്നും അസീസിയയിലെ താമസ സ്ഥലത്തേക്ക് വഴിയറിയാതെ വരുന്ന ഹാജിമാരെ പ്രത്യേകം തയ്യാറാക്കിയ വാഹനങ്ങളില്‍ എത്തിക്കാന്‍ വോളണ്ടിയര്‍മാര്‍ മത്സരിക്കുകയായിരുന്നു. അതേ സമയം ഹജ്ജ് അവസാനിച്ചെങ്കിലും മക്കയിലും മദീനയിലും സന്നദ്ധ പ്രവര്‍ത്തകരുടെ സഹായം തുടരുന്നുണ്ട്. തുടര്‍ന്ന് സഊദിയുടെ വിവിധ ഭാഗങ്ങളില്‍ നിന്നും എത്തിയ വിഖായ സന്നദ്ധ പ്രവര്‍ത്തകര്‍ക്കുള്ള യാത്രയപ്പ് സംഗമം മക്ക അസീസിയയില്‍ സമസ്ത പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങള്‍ ഉദ്ഘാടനം ചെയ്തു. അബ്ദുസമദ് പൂക്കോട്ടൂര്‍ മുഖ്യ പ്രഭാഷണം നടത്തി.