കോഴിക്കോട്: മുഖ്യമന്ത്രിയുടെ ദുരിതാശ്വാസ നിധിയിലേക്ക് നിരവധി പേരോടൊപ്പം ഒരു തുക സംഭാവന ചെയ്തിരിക്കുകയാണ് സി.പി അഷ്ഫാഖ് എന്ന ഒന്നാം ക്ലാസുകാരന്‍. ജില്ലാ കലക്ടര്‍ യു.വി ജോസിന്റെ കൈകളില്‍ അച്ഛനൊപ്പമെത്തിയാണ് തുക കൈമാറിയത്. കടുത്ത ഫുട്‌ബോള്‍ ആരാധകനായ അഫു ഫുട്‌ബോള്‍ കിറ്റ് എന്ന തന്റ സ്വപ്നം സാക്ഷാല്‍കരിക്കാനായി സ്വരൂപിച്ച പണമാണ് ദുരിതാശ്വാസ നിധിയിലേക്ക് സംഭാവന ചെയ്തത്.
ദുരന്തവാര്‍ത്തകള്‍ ടി.വിയിലൂടെ അറിയുമ്പോഴെല്ലാം കുഞ്ഞ് അഫു ആകുലത നിറഞ്ഞ മുഖത്തോടെ അത് കണ്ടിരിക്കും. ദുരന്ത മുഖത്തു നിന്നുള്ള കുഞ്ഞുമുഖങ്ങളാണ് അഫുവിനെ തന്റെ ചെറിയ നീക്കിയിരിപ്പ് അവര്‍ക്കായി നല്‍കാന്‍ പ്രേരിപ്പിച്ചതെന്ന് അഫുവിന്റെ പിതാവ് അഷ്‌റഫ് പറയുന്നു.
കാരന്തൂര്‍ സെന്റ് അലോഷ്യസ് സ്‌കൂളിലെ ഒന്നാം ക്ലാസ് വിദ്യാര്‍ഥിയാണ് അഷ്ഫാഖ്. ക്രിസ്റ്റ്യാനോ റൊണോള്‍ഡോയുടെ ആരാധകനായ അഷ്ഫാഖിന് റൊണാള്‍ഡോയെ പോലെ ലോകമറിയുന്ന ഫുട്‌ബോള്‍ കളിക്കാരനാകാനാണ് ആഗ്രഹം. മുണ്ടിക്കല്‍ത്താഴം സ്വദേശികളായ അഷ്‌റഫിന്റെയും ബീഗം മെഹര്‍നിക്കിന്റെയും മകനാണ് അഷ്ഫാഖ്.