കാസര്‍കോട്: തെരഞ്ഞെടുപ്പ് ദിനത്തില്‍ ജില്ലയിലെ 43 പ്രശ്‌നബാധിത ബൂത്തുകളിലെ പ്രവര്‍ത്തനങ്ങള്‍ തത്സമയം നിരീക്ഷിച്ച് തെരഞ്ഞെടുപ്പ് വരണാധികാരികൂടിയായ കലക്ടര്‍ ഡോ. ഡി. സജിത് ബാബുവും സംഘവും. കലക്ടറേറ്റ് മിനികോണ്‍ഫറന്‍സ് ഹാളില്‍ പ്രത്യേകം സജ്ജമാക്കിയ കണ്‍ട്രോള്‍ റൂമിലാണ് ജില്ലയിലെ 43 ബൂത്തുകളിലെ വോട്ടെടുപ്പ് കലക്ടര്‍ തത്സമയം നിരീക്ഷിച്ചത്. പൊതുനിരീക്ഷകന്‍ എസ്. ഗണേഷ്, പൊലിസ് നിരീക്ഷകന്‍ ഓംപ്രകാശ് ത്രിപാഠി, എ.ഡി.എം സി. ബിജു, ഇലക്ഷന്‍ ഡെപ്യൂട്ടി കലക്ടര്‍ വി.പി അബ്ദുറഹ്മാന്‍, ട്രെയിനിങ് നോഡല്‍ ഓഫിസര്‍ കെ. വിനോദ് കുമാര്‍ എന്നിവരും തത്സമയ നിരീക്ഷണത്തില്‍ പങ്കാളികളായി.
ഹുസൂര്‍ ശിരസ്തദാര്‍ കെ. നാരായണന്റെ ഏകോപനത്തില്‍ കലക്ടറേറ്റിലെ ജീവനക്കാരാണ് കണ്‍ട്രോള്‍ റൂമില്‍ പ്രവര്‍ത്തിച്ചത്. എന്‍.ഐ.സി ജില്ലാ ഓഫിസര്‍ കെ. രാജന്റെ നേതൃത്വത്തില്‍ സാങ്കേതിക സഹായം നല്‍കി. അക്ഷയ ജില്ലാ പ്രൊജക്ട് മാനേജര്‍ ശാരികാ ബാലഗോപാലന്റെ നേതൃത്വത്തിലാണ് വെബ് കാസ്റ്റിങ് നടത്തിയത്. പ്രശ്‌നബാധിത ബൂത്തുകളോരോന്നിലും സെറ്റ് ചെയ്ത വെബ്കാമറയില്‍ നിന്നുള്ള തത്സമയ ദൃശ്യങ്ങളാണ് കണ്‍ട്രോള്‍ റൂമില്‍ കലക്ടറുടെ നേതൃത്വത്തിലുള്ള സംഘം വീക്ഷിച്ചത്.