കേളകം: കണിച്ചാറിലെ 109 വയസുള്ള മാടശ്ശേരി നാരായണന്‍ ഇത്തവണയും പരസഹായമില്ലാതെ വോട്ട് ചെയ്യാനെത്തി. കണിച്ചാര്‍ യു.പി സ്‌കൂളിലെ ബൂത്തിലാണു നാരായണന്‍ വോട്ട് രേഖപ്പെടുത്തിയത്. പ്രായം ഏറെയായെങ്കിലും അതൊന്നും വകവയ്ക്കാതെ വോട്ട് ചെയ്യാനെത്തിയ നാരായണനാണ് ഇന്നലെ ജില്ലയില്‍ താരമായത്. വയസ് 109 ആയെങ്കിലും സ്മാര്‍ട്ടാണ് ഇദ്ദേഹം. ദൈനംദിന ജീവിതത്തിലെ കാര്യങ്ങള്‍ പരമാവധി പരസഹായമില്ലാതെ നിര്‍വഹിക്കും. ഒരു തെരഞ്ഞെടുപ്പ് കൂടി വന്നെത്തുമ്പോള്‍ നാരായണന്റെ വോട്ടിനു പ്രാധാന്യമേറെയുണ്ട്. വയോജനങ്ങളെ രാഷ്ട്രീയ പാര്‍ട്ടികളുടെ പ്രവര്‍ത്തകര്‍ ബൂത്തുകളിലെത്തിച്ച് ഓപ്പണ്‍ വോട്ട് ചെയ്യിക്കുന്ന പതിവ് തെരഞ്ഞെടുപ്പ് ദിവസത്തെ മുഖ്യപ്രവര്‍ത്തനമാണ്. എന്നാല്‍ ഓപ്പണ്‍ വോട്ട് ചെയ്യാമെന്നു പറഞ്ഞ് മാടശ്ശേരിയെ ആരെങ്കിലും സമീപിച്ചാല്‍ തനിക്ക് പരസഹായം വേണ്ടെന്നാണ് ഇദ്ദേഹത്തിന്റെ ഭാഷ്യം.
പരസഹായമില്ലാതെ തന്റെ മനസില്‍ സൂക്ഷിക്കുന്ന രാഷ്ട്രീയത്തിനു പ്രാമുഖ്യം നല്‍കി സ്വന്തം വോട്ട് രേഖപ്പെടുത്തും. ഈ തെരഞ്ഞെടുപ്പിലും അതില്‍ മാറ്റമില്ലെന്ന് അദ്ദേഹം ഉറപ്പിച്ചു. ദിവസവും പത്രവായന നിര്‍ബന്ധമാണു നാരായണന്. മുഖപ്രസംഗ പേജടക്കം മനസിരുത്തി വായിക്കും. കുശലം പറയാന്‍ എത്തുന്നവരോടു നല്ല ഓര്‍മശക്തിയോടെ തമാശ കലര്‍ത്തി രാഷ്ട്രീയം പറയും. പ്രാഥമിക വിദ്യാഭ്യാസം മാത്രമേയുള്ളൂ ഇദ്ദേഹത്തിന്.
1945 കാലത്ത് തിരുവിതാംകൂറില്‍ നിന്നു മലബാറിലേക്കു കുടിയേറിയ ജനവിഭാഗത്തിന്റെ പ്രതിനിധിയാണു മാടശ്ശേരി നാരായണന്‍. അങ്ങനെ കണിച്ചാറിലെത്തി ജീവിതം കെട്ടിപ്പടുത്തവരില്‍ ഒരാള്‍. കഠിനാധ്വാനത്തിന്റെ അതിജീവനത്തിന്റെ കരുത്തുറ്റ ഓര്‍മകളുണ്ട് അങ്ങനെയുള്ളവരുടെ മനസില്‍. ആ കാലവും ഏതാണ്ടൊക്കെ ഓര്‍മിച്ചെടുക്കാന്‍ മാടശ്ശേരിക്കു പറ്റും.
കണിച്ചാര്‍ സുബ്രഹ്മണ്യ സ്വാമി ക്ഷേത്രത്തിലെ ശാന്തിയായിരുന്നു അന്‍പതു വര്‍ഷക്കാലം. ഭാര്യ മീനാക്ഷിക്കു 97 വയസായി.