കോട്ടയം : വെള്ളപ്പൊക്ക ദുരിതബാധിത മേഖലകളില്‍ ആരോഗ്യസംരക്ഷണമെന്ന ദൗത്യം പൂര്‍ത്തിയാക്കിയ ചാരിതാര്‍ത്ഥ്യത്തിലാണ് കുറിച്ചി ആയുഷ് പ്രൈമറി ഹെല്‍ത്ത് സെന്ററിലെ മെഡിക്കല്‍ ഓഫീസര്‍ ഡോ.മിഥുന്‍ ജെ കല്ലൂരും സംഘവും.
രാപകല്‍ ഭേദമില്ലാതെ കുറിച്ചി ഗ്രാമപഞ്ചായത്തിലെ മുഴുവന്‍ ദുരിതാശ്വാസ ക്യാമ്പുകളിലും (20) സമീപ പ്രദേശത്തുള്ള അഞ്ചു ക്യാമ്പുകളിലുമായി വെള്ളപ്പൊക്ക ദുരിതം രൂക്ഷമായ ദിവസങ്ങളിലായാണ് സന്ദര്‍ശിച്ചു ചികില്‍സ ലഭ്യമാക്കിയത്. എല്ലാ ക്യാമ്പുകളിലുമായി അരിഷ്ടങ്ങള്‍, തൈലങ്ങള്‍, രസോത്തമാദി ലേപം, താലീസപത്രാദി ചൂര്‍ണ്ണം, കുടിവെള്ളം തിളയ്പ്പിക്കുന്നതിന് കഷായ ചൂര്‍ണ്ണം, അപരാജിതധൂപ ചൂര്‍ണ്ണം മറ്റ് പേറ്റന്റ് മരുന്നുകളും ആയുര്‍വേദ മെഡിക്കല്‍ ടീം ലഭ്യമാക്കി.
നല്‍കിയ മരുന്നുകളുടെ വിവരങ്ങളും എണ്ണവും ക്യാമ്പ് കണ്‍വീനര്‍മാരെയോ ചുമതലയുള്ളവരെയോകൊണ്ട് സാക്ഷ്യപെടുത്തിയാണ് പോന്നത്. കുറിച്ചി ഗ്രാമപഞ്ചായത്ത് പ്രസിഡന്റ്, സെക്രട്ടറി, അംഗങ്ങള്‍ സജീവ പിന്തുണ തങ്ങള്‍ക്കുണ്ടായിരുന്നതായി ഡോ.മിഥുന്‍.ജെ.കല്ലൂര്‍ വ്യക്തമാക്കി. പഞ്ചായത്ത് വാഹനം മറ്റ് ദുരിതാശ്വാസ പ്രവര്‍ത്തനങ്ങള്‍ക്കായി പോയത് മൂലം സ്വന്തം വാഹനങ്ങളിലാണ് മെഡിക്കല്‍ ടീം ഈ ക്യാമ്പുകള്‍ അത്രയും സന്ദര്‍ശിച്ചത്. ഇപ്പോള്‍ ആവശ്യമുള്ള പ്രദേശങ്ങളില്‍ രണ്ടാംഘട്ടം സന്ദര്‍ശനങ്ങളും നടത്തു വരുന്നുണ്ട്. ഡോ.മിഥുന്റെ നേതൃത്വത്തില്‍ നേത്യത്വത്തില്‍ ഡോ.രശ്മി കെ ആര്‍, ഡോ.രേഷ്മ ആര്‍ നായര്‍ എന്നിവരും ഒരു ദിവസവേതന അറ്റന്‍ഡറും മെഡിക്കല്‍ ടീമിലുണ്ടായിരുന്നു.