തിരുവനന്തപുരം: അവിശ്വാസ പ്രമേയ ചര്‍ച്ചക്കിടെ ഷാഫി പറമ്പിലിന്റെ പരാമര്‍ശം നീക്കണമെന്ന് ആവശ്യപ്പെട്ട് ഗണേഷ് കുമാര്‍ എഴുന്നേറ്റതിനു പിന്നാലെ നിയമസഭയില്‍ ഭരണ-പ്രതിപക്ഷ വാക്കേറ്റം. 

വിഷയത്തില്‍ മുഖ്യമന്ത്രിയും പ്രതിപക്ഷ നേതാവും കൂടി ഇടപെട്ടതോടെ അല്‍പനേരം സഭ പ്രക്ഷുബ്ദമായി. ഗണേഷ് കുമാര്‍ ഇപ്പോള്‍ സര്‍ക്കാരിനെ ന്യായീകരിക്കുന്നത് അദ്ദേഹത്തിന്റെ പിതാവ് കേള്‍ക്കാതിരിക്കട്ടെയെന്നും നേരത്തേ പിതാവിനെ ജയിലില്‍ അടച്ചതിന് ഇടതുപക്ഷത്തിനെതിരേ പരാതി പറഞ്ഞുനടന്നവര്‍ ഇപ്പോള്‍ അവരെ അനുകൂലിക്കുകയാണെന്നുമായിരുന്നു ഷാഫി പറമ്പിലിന്റെ പരാമര്‍ശം. ഇതിനു മറുപടിയായി താന്‍ ഓടിളക്കി വന്നതല്ലെന്നും ഇടതുപക്ഷത്തോട് ചേര്‍ന്നത് തന്റെ പാര്‍ട്ടിയുടെ തീരുമാനപ്രകാരമാണെന്നും  പറഞ്ഞ ഗണേഷ്  കുമാര്‍ പരാമര്‍ശം സഭാ രേഖകളില്‍ നിന്ന് നീക്കണമെന്നും ആവശ്യപ്പെട്ടു.  

ഗണേഷ് കുമാര്‍ മറുപടി പറഞ്ഞതിനു പിന്നാലെ അനില്‍ അക്കര  അദ്ദേഹത്തിന്റെ സീറ്റിനടുത്തേക്ക്  വരാനൊരുങ്ങിയത് ശരിയായില്ലെന്ന് പറഞ്ഞ് മുഖ്യമന്ത്രി എഴുന്നേറ്റു. നിലപാട് വ്യക്തമാക്കാന്‍ എല്ലാവര്‍ക്കും അവസരമുണ്ടെന്നും മുഖ്യമന്ത്രി പറഞ്ഞു. 

ഇതോടെ സഭ ബഹളത്തില്‍ മുങ്ങി. മുഖ്യമന്ത്രി ഭീഷണിപ്പെടുത്തേണ്ടെന്നു പറഞ്ഞ് പ്രതിപക്ഷ നേതാവ് എഴുന്നേറ്റു. ഗണേഷ് കുമാര്‍ സീറ്റിലിരുന്ന് പ്രതിപക്ഷത്തെ വെല്ലുവിളിക്കുകയായിരുന്നുവെന്നും മുഖ്യമന്ത്രി പക്ഷംപിടിച്ച് സംസാരിക്കരുതെന്നും  ചെന്നിത്തല പറഞ്ഞു. 

വേണമെങ്കില്‍ വിഡിയോ ദൃശ്യങ്ങള്‍ പരിശോധിക്കാമെന്നും ചെന്നിത്തല പറഞ്ഞു. മന്ത്രി ഇ.പി ജയരാജന്‍, എം.എല്‍.എമാരായ കെ.സി ജോസഫ്, എം.സ്വരാജ്, കെ.എസ് ശബരീനാഥന്‍, അനില്‍ അക്കര തുടങ്ങിയവര്‍ തമ്മില്‍ വാക്കേറ്റമായി. പ്രശ്‌നം  രൂക്ഷമായതോടെ ഇടപെട്ട് സംസാരിച്ച സ്പീക്കര്‍ വിഷയം പരിശോധിക്കുമെന്നും സഭയുമായി ബന്ധപ്പെട്ട പരാമര്‍ശങ്ങള്‍ മാത്രമേ രേഖകളില്‍ ഉണ്ടാകൂവെന്നും വ്യക്തമാക്കിയതോടെയാണ് അംഗങ്ങള്‍ പിന്തിരിഞ്ഞത്.