കൊല്‍ക്കത്ത: നീറ്റ്, ജെ.ഇ.ഇ പരീക്ഷകള്‍ മാറ്റിവയ്ക്കണമെന്നാവശ്യപ്പെട്ട് വീണ്ടും ബംഗാള്‍ മുഖ്യമന്ത്രി മമത ബനാര്‍ജി. നിശ്ചയിച്ച പ്രകാരം പരീക്ഷ നടത്തുകയാണെങ്കില്‍ അത് വിദ്യാര്‍ഥികളുടെ ജീവന് തന്നെ ഭീഷണിയാവുമെന്ന് മമത ട്വീറ്റ് ചെയ്തു. 

2020 സെപ്റ്റംബര്‍ അവസാനത്തോടെ സര്‍വകലാശാലകളിലും കോളജുകളില്‍ ടെര്‍മിനല്‍ പരീക്ഷകള്‍ പൂര്‍ത്തിയാക്കണമെന്ന യു.ജി.സി മാര്‍ഗനിര്‍ദേശങ്ങള്‍ക്കെതിരേ പ്രധാനമന്ത്രിയുടെ വീഡിയോ കോണ്‍ഫറന്‍സില്‍ താന്‍ ശബ്ദമുയര്‍ത്തിയിരുന്നുവെന്നും മമത പറയുന്നു.  സെപ്റ്റംബറില്‍ നീറ്റ്, ജെ.ഇ.ഇ പരീക്ഷകള്‍ നടത്താന്‍ വിദ്യാഭ്യാസ മന്ത്രാലയം നിര്‍ദേശം നല്‍കിയ സാഹചര്യത്തില്‍ ഇതിന്റെ അപകടസാധ്യത വീണ്ടും വിലയിരുത്താനും സാഹചര്യം അനുകൂലമാകുന്നതുവരെ ഈ പരീക്ഷകള്‍ മാറ്റിവയ്ക്കാനും താന്‍ വീണ്ടും കേന്ദ്രത്തോട് അഭ്യര്‍ഥിക്കുന്നു. എല്ലാ വിദ്യാര്‍ഥികള്‍ക്കും സുരക്ഷ ഉറപ്പാക്കേണ്ടത് തങ്ങളുടെ കടമയാണന്നും മമത ട്വീറ്റ് ചെയ്തു. 

സെപ്തംബര്‍ ഒന്ന്  മുതല്‍ ആറ് വരെയാണ് ജെ.ഇ.ഇ പരീക്ഷ. നീറ്റ് പരീക്ഷ സെപ്തംബര്‍ 13നാണ്. പരീക്ഷ നീട്ടിവക്കണമെന്ന് ആവശ്യപ്പെട്ട് സമര്‍പ്പിച്ച ഹരജി സുപ്രീം കോടതി തള്ളിയിരുന്നു.