ഹൈദരാബാദ്: ബാഡ്മിന്റണ്‍ ഏഷ്യാ ചാംപ്യന്‍ഷിപ്പില്‍ പി. വി സിന്ധു, സൈന നെഹ്‌വാള്‍, സമീര്‍ വര്‍മ എന്നിവര്‍ക്ക് ജയം. മുന്‍ ലോക ഒന്നാം നമ്പര്‍ താരമായിരുന്ന കെ. ശ്രീകാന്ത് തോറ്റ് പുറത്തായി. കഴിഞ്ഞ ദിവസം നടന്ന മത്സരത്തില്‍ ഇന്തോനേഷ്യന്‍ താരവും ലോക 51ാം റാങ്കുകാരനുമായ ശേഷന്‍ ഹിരണോട് പരാജയപ്പെട്ടാണ് ശ്രീകാന്ത് പുറത്തായത്.

16-21, 20-22 നേരിട്ടുള്ള സെറ്റുകള്‍ക്കായിരുന്നു ശ്രീകാന്തിന്റെ തോല്‍വി. രണ്ടാം സെറ്റില്‍ 18-13ന്റെ ലീഡുണ്ടായിരുന്നെങ്കിലും സെറ്റ് പിടിക്കാന്‍ ശ്രീകാന്തിനായില്ല. ലോക 15-ാം റാങ്ക് താരമായ ജപ്പാന്റെ കുസുമായ് സകായിയെ പരാജയപ്പെടുത്തിയാണ് സമീര്‍ വര്‍മ രണ്ടാം റൗണ്ടില്‍ പ്രവേശിച്ചത്. 21-13, 17-21, 21-18 എന്ന സ്‌കോറിനായിരുന്നു സമീറിന്റെ ജയം. പ്രീ ക്വാര്‍ട്ടറില്‍ ഹോങ്കോങ്ങിന്റെ നാക ആങ്കസിനെ നേരിടും. ജപ്പാന്‍ താരം സയാകാ തകാശിയെയാണ് സിന്ധു പരാജയപ്പെടുത്തിയത്. 21-14, 21-7 എന്ന സ്‌കോറിനായിരുന്നു സിന്ധുവിന്റെ ജയം. 28 മിനിട്ട് നീണ്ടു നിന്ന പോരാട്ടത്തിനൊടുവില്‍ ഏകപക്ഷീയമായിട്ടായിരുന്നു സിന്ധുവിന്റെ ജയം.

ചൈന താരമായ സിയായാനെ പ്രീ ക്വാര്‍ട്ടറില്‍ സിന്ധു നേരിടും. ചൈനയുടെ ഹാന്‍ യുയിയെയാണ് സൈന നെഹ്‌വാള്‍ പരാജയപ്പെടുത്തിയത്. 12-21, 21-11, 21-17 എന്ന സ്‌കോറിനായിരുന്നു സൈനയുടെ ജയം. ആദ്യ സെറ്റ് കൈവിട്ട സൈന മികച്ച പോരാട്ടത്തിലൂടെ തിരിച്ച് വന്ന് രണ്ടും മൂന്നൂം സെറ്റുകള്‍ സ്വന്തമാക്കുകയായിരുന്നു.