വടകര: ഒഞ്ചിയം എടക്കണ്ടിക്കുന്നില്‍ ആര്‍.എം.പി.ഐ പ്രവര്‍ത്തകന്റെ വീടിന് കല്ലേറ്. ഒഞ്ചിയം സമരസേനാനിയും ആര്‍.എം.പി.ഐ നേതാവുമായിരുന്ന പരേതനായ മനക്കല്‍ത്താഴക്കുനി ഗോവിന്ദന്റെ മകന്‍ എം.കെ സുനില്‍ കുമാറിന്റെ വീടിനുനേരെയാണ് അക്രമമുണ്ടായത്.
ഇന്നലെ പുലര്‍ച്ചെ രണ്ടോടെ ഒരുസംഘം വീടിന് കല്ലെറിയുകയായിരുന്നു. വീട്ടുകാര്‍ പുറത്തിറങ്ങിയപ്പോഴേക്കും അക്രമിസംഘം ഓടി മറഞ്ഞു.
അക്രമത്തിനു പിന്നില്‍ സി.പി.എം ആണെന്ന് ആര്‍.എം.പി .ഐ ആരോപിച്ചു.
വീടിന്റെ അടുക്കളയുടെ മൂന്ന് ജനല്‍ ചില്ലുകള്‍ കല്ലേറില്‍ പൂര്‍ണമായും തകര്‍ന്നിട്ടുണ്ട്. സംഭവം നടന്നയുടന്‍ ചോമ്പാല പൊലിസില്‍ പരാതി നല്‍കിയെങ്കിലും അവര്‍ എത്തിയത് രാവിലെ ഒന്‍പതോടെയാണ്.