കടയ്ക്കല്‍:  ഊറ്റുകുഴിയില്‍ വഴിത്തര്‍ക്കം വീടിനുനേരെയുള്ള ആക്രമണത്തില്‍ കലാശിച്ചു.സംഭവത്തിലെ പ്രതിയെ പിടികൂടുന്നതിനിടെ എ.എസ്.ഐയുടെ കൈയ്ക്ക് പരുക്കേറ്റു.
ഊറ്റുകുഴി സ്വദേശി സുദര്‍ശനന്റെ വീടിനുനേരെയാണ് ആക്രമണമുണ്ടായത്. ഇന്നലെ പുലര്‍ച്ചെയാണ് സംഭവം. സമീപവാസിയും വിമുക്തഭടനുമായ ഷിനോദാണ് ആക്രമണം നടത്തിയത്. വിവരമറിഞ്ഞെത്തിയ പൊലിസ് സംഘത്തെയും ഇയാള്‍ ആക്രമിച്ചു. ഇയാളെ പിടികൂടാനുള്ള ശ്രമത്തിനിടെ വീടിന്റെ കതകിനിടയില്‍പെട്ടാണ്  കടയ്ക്കല്‍ സ്റ്റേഷനിലെ എ.എസ്.ഐ സന്തോഷിന്റെ കൈയ്ക്കു  പരുക്കേറ്റത്. ഏറെനേരത്തെ പരിശ്രമത്തിനൊടുവിലാണ് ഷിനോദിനെ പൊലിസ് പിടികൂടിയത്.കൈയ്ക്ക് ഗുരുതരമായി പരുക്കേറ്റ എ.എസ.്‌ഐ സന്തോഷ് പിന്നീട് കടയ്ക്കല്‍ താലൂക്കാശുപത്രിയില്‍ ചികിത്സതേടി.
മുമ്പും സമാനരീതിയില്‍ ഇരുകൂട്ടരും തമ്മില്‍ പ്രശ്‌നങ്ങള്‍ ഉണ്ടായിട്ടുണ്ടെങ്കിലും രാഷ്ട്രീയ ഇടപെടലില്‍ ഒത്തുതീര്‍പ്പുണ്ടാക്കിയിരുന്നു. പിടിയിലായ ഷിനോദിനെ പിന്നീട് സ്റ്റേഷന്‍ ജാമ്യത്തില്‍ വിട്ടയച്ചു.