കൊല്ലം: അനധികൃത മദ്യക്കച്ചവടത്തിനിടെ സ്ത്രീ പിടിയില്‍. നിരവധി അബ്കാരി കേസുകളിലെ പ്രതിയും പിടികിട്ടാപുള്ളിയുമായ അഞ്ചുപൂക്കള്‍ എന്നറിയപ്പെടുന്ന അനധികൃത മദ്യക്കച്ചവട സംഘത്തില്‍പ്പെട്ട ആദിനാട് മണ്ടാനത്തു കിഴക്കതില്‍ താങ്കമണിയാ(56)ണ് ഇന്നലെ രാവിലെ നടത്തിയ റെയ്ഡില്‍ കരുനാഗപ്പള്ളി എക്‌സൈസ് സംഘത്തിന്റെ പിടിയിലായത്. കഴിഞ്ഞ വര്‍ഷം ഓഗസറ്റില്‍ അനധികൃത മദ്യക്കച്ചവടത്തിനു ഇവര്‍ക്കെതിരേ നേരത്തെ കേസെടുത്തിരുന്നെങ്കിലും എക്‌സൈസിനെ വെട്ടിച്ചു ഇവര്‍ കടന്നു കളഞ്ഞിരുന്നു. ദിവസം മുഴുവനും മിനിബാര്‍ പോലെ മദ്യക്കച്ചവടം നടത്തുകയായിരുന്നു ഇവര്‍. അയലത്തെ ബന്ധു സ്ത്രീയെയും അവരുടെ പ്രായമായ അമ്മയെയും മനുഷ്യ കവചമായി നിര്‍ത്തിയായിരുന്നു മദ്യക്കച്ചവടം. എക്‌സൈസ് സംഘത്തെക്കണ്ടു ഓടാന്‍ ശ്രമിക്കുന്നതിനിടയില്‍ കിണറിന്റെ വശത്തില്‍ തട്ടി തലയില്‍ ചെറിയ മുറിവ് ബോധപൂര്‍വം ഇവര്‍ വരുത്തിയിരുന്നു. തുടര്‍ന്ന് വനിതാ എക്‌സൈസ് ഉദ്യോഗസ്ഥരുമായി ദീര്‍ഘനേരം മല്‍പ്പിടുത്തം നടത്തിയതിനു ശേഷമാണ് അവര്‍ കീഴടങ്ങിയത്. കോടതിയില്‍ ഹാജരാക്കിയ തങ്കമണിയെ റിമാന്‍ഡ് ചെയ്തു. കഴിഞ്ഞയാഴ്ച അഞ്ചുപൂക്കള്‍ സംഘത്തിലെ രാധയെയും അറസ്റ്റ് ചെയ്തിരുന്നു. ഇവര്‍ ഇപ്പോഴും ജയിലിലാണ്. എക്‌സ്സൈസ് ഇന്‍സ്‌പെക്ടര്‍ എ.ജോസ്പ്രതാപ്,പ്രവന്റിവു ഓഫീസര്‍മാരായ അന്‍വര്‍, ഹരികൃഷ്ണന്‍,സിവില്‍ എക്‌സൈസ് ഓഫീസര്‍മാരായ ദിലീപ്, പ്രസാദ്, ജിനു താങ്കചന്‍, ശ്യാം ദാസ് എന്നിവര്‍ എക്‌സൈസ് സംഘത്തില്‍ ഉണ്ടായിരുന്നു. വ്യാജമദ്യ വില്‍പ്പന നടത്തുന്നവരെ അറസ്റ്റ് ചെയ്യാനെത്തുമ്പോള്‍ തടയുന്നവര്‍ക്കെതിരേ ഔദ്യോഗിക കൃത്യനിര്‍വഹണം തടസപ്പെടുത്തുന്നത്തിനു ജാമ്യമില്ലാ വകുപ്പ് പ്രകാരം കേസെടുക്കുമെന്ന് എക്‌സൈസ് സംഘം അറിയിച്ചു.