കല്‍പ്പറ്റ: കലിമഴക്കാലവും ഓണാവധിയും കഴിഞ്ഞ് വിദ്യാലയങ്ങളില്‍ ഇന്ന് മണി മുഴങ്ങും. അധ്യയനം ആരംഭിച്ച ശേഷം പതിനാറ് പ്രവര്‍ത്തി ദിനങ്ങളാണ് ഇതുവരെ നഷ്ടമായത്. ഇനിയുള്ള പരമാവധി ദിവസങ്ങള്‍ പ്രയോജനപെടുത്തി അധ്യയനം സാധാരണ നിലയിലാക്കാണ് അധികൃതരുടെ ശ്രമം.
ജൂണ്‍ ഒന്നിന് സ്‌കൂള്‍ തുറന്ന് രണ്ടാം പ്രവര്‍ത്തി ദിവസം തന്നെ ജില്ലയില്‍ നിപ ഭീതി കാരണം അവധി പ്രഖ്യാപിച്ചിരുന്നു. ജൂണില്‍ നിപ കാരണം രണ്ട് അവധിയും മഴ കാരണം ഒരു അവധിയും ഉണ്ടായി. ജൂലൈ മാസത്തില്‍ നാല് ദിവസം മഴ കാരണം സ്‌കൂള്‍ക്ക് അവധി നല്‍കി. കനത്ത മഴ പെയ്ത ഓഗസ്റ്റില്‍ തുടര്‍ച്ചയായി ഒന്‍പത് ദിവസമാണ് അവധിയായത്. ഇതടക്കം പതിനാറ് പ്രവൃത്തി ദിവസമാണ് നഷ്ടമായത്. ഇതിന് പുറമെ ഓണാവധിയില്‍ പത്ത് ദിവസവും സ്‌കൂള്‍ അടഞ്ഞ് കിടന്നു. ഇതിന് ശേഷമാണ് ഇന്ന് സ്‌കൂള്‍ തുറക്കുന്നത്. സ്‌കൂള്‍ തുറക്കുന്നത് കണക്കിലെടുത്ത് ദുരിതാശ്വാസ ക്യാംപുകള്‍ പ്രവര്‍ത്തിച്ചിരുന്ന സ്‌കൂളുകളില്‍ നിന്നും ക്യാംപുകള്‍ മറ്റിടങ്ങളിലേക്ക് മാറ്റിയിട്ടുണ്ട്. ക്യാംപുകള്‍ പ്രവര്‍ത്തിച്ചിരുന്ന സ്‌കൂളുകളില്‍ ഇന്നലെ ശുചീകരണം നടത്തി. ഇത്രയും അവധി ലഭിച്ചതോടെ അധ്യായനത്തെ സാരമായി തന്നെ ബാധിക്കുമെന്ന ആശങ്കയിലാണ് അധികൃതര്‍.
ഓണ പരീക്ഷക്ക് മുമ്പ് ആകെ നിര്‍ദേശിക്കപ്പെട്ടത് 53 പ്രവര്‍ത്തി ദിവസങ്ങളായിരുന്നു. ഇത്രയും പ്രവര്‍ത്തി ദിവസങ്ങളിലാണ് 16 എണ്ണം നഷ്ടമായത്.
പ്രളയത്തെ തുടര്‍ന്നുള്ള മാനസിക സഘര്‍ഷങ്ങള്‍ കുട്ടികളില്‍ മാറിയ ശേഷമെ ഓണ പരീക്ഷ നടത്തുകയുള്ളു. പരമാവധി ശനിയാഴ്ച്ചകള്‍ വരെ പ്രവര്‍ത്തി ദിവസങ്ങളാക്കി അധ്യായനം നല്ല നിലയില്‍ പൂര്‍ത്തിയാക്കാനാണ് അധികൃതരുടെ തീരുമാനം. സ്‌കൂള്‍ തുറന്ന ആദ്യദിനങ്ങളില്‍ മനസിക സംഘര്‍ഷങ്ങള്‍ ലഘൂകരിക്കുന്നതിനായി കുട്ടികള്‍ക്ക് കൗണ്‍സിലിങ്ങ്് നല്‍കാനും നിര്‍ദേശമുണ്ട്.
മഴക്കെടുതിയില്‍ പുസ്തകങ്ങള്‍ നഷ്ടപ്പെട്ടവര്‍ക്ക് ഇന്ന് പുതിയ പുസ്തകം വിതരണം ചെയ്യും.
മഴക്കെടുതിയില്‍ നഷ്ടപ്പെട്ടവക്ക് പകരം കഴിയുന്നത്ര വിദ്യാര്‍ഥികള്‍ക്ക് ഇന്ന് അവ വിതരണം ചെയ്യുന്നതിനുള്ള ഒരുക്കങ്ങളെല്ലാം വിദ്യാഭ്യാസ വകുപ്പ് പൂര്‍ത്തിയാക്കിയിട്ടുണ്ട്.
കുട്ടികളുടെ ആത്മവിശ്വാസം വര്‍ധിപ്പിക്കുന്നതിന് വിവിധ പരിപാടികള്‍ സ്‌കൂളില്‍ സംഘടിപ്പിച്ചിട്ടുണ്ടെന്നും ജില്ലാ കലക്ടര്‍ അറിയിച്ചു.