മലപ്പുറം: സുന്നി യുവജന സംഘം ജില്ലാ കമ്മിറ്റിയുടെ മുസാഅദ സഹായ നിധിയിലേക്കുള്ള ഫണ്ട് സമാഹരണം 31ന് മഹല്ലുകളില്‍ നടത്തണമെന്ന് നേതാക്കള്‍ ആഹ്വാനം ചെയ്തു. എല്ലാ വര്‍ഷവും ബലിപെരുന്നാള്‍ സുദിനത്തില്‍ നടക്കാറുള്ള മുസാഅദ സമാഹരണം പ്രളയക്കെടുതി കാരണം സയ്യിദ് ഹൈദരലി ശിഹാബ് തങ്ങളുടെ നിര്‍ദേശപ്രകാരം 31ലേക്ക് മാറ്റുകയായിരുന്നു.
31ന് പിരിച്ചെടുക്കുന്ന സംഖ്യ പഞ്ചായത്ത് കോഡിനേറ്റര്‍മാര്‍ മുഖേന മണ്ഡലം കോഡിനേറ്റര്‍മാരെ ഒന്നാം തിയതി ഏല്‍പ്പിക്കണം. മത പ്രബോധന രംഗത്ത് നിറസാന്നിധ്യമായി മാറിയ നിരവധി രോഗികളെ സഹായിക്കാന്‍ സാധിച്ചിട്ടുള്ള മുസാഅദ സംവിധാനം ജില്ലയില്‍ എസ്.വൈ.എസിനു കീഴില്‍ നടക്കുന്ന പ്രധാന പ്രദ്ധതിയാണ്.
നിര്‍ധനരായ പെണ്‍കുട്ടികള്‍ക്ക് ആഭരണവും വിവാഹ ചെലവും നല്‍കുന്ന ഉസ്‌വയടക്കം ജീവകാരുണ്യ പ്രവര്‍ത്തന മേഖലയില്‍ സുന്നി യുവജന സംഘം നിരവധി പ്രവര്‍ത്തനങ്ങള്‍ നടത്തിവരുന്നുണ്ട്. 31ന് നടക്കുന്ന മുസാഅദ ഫണ്ട് സമാഹരണം വിജയിപ്പിക്കാന്‍ മഹല്ല് ഭാരവാഹികളോടും ഖത്വീബുമാരോടും സമസ്ത വൈസ് പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ അഭ്യര്‍ഥിച്ചു.