ദുബൈ: ഇസ്‌റാഈലില്‍ നിന്നുള്ള ആദ്യ വിമാനത്തില്‍ യു.എ.ഇയിലെത്തിയ യു.എസ് പ്രസിഡന്റിന്റെ ഉപദേശകന്‍ ജറാദ് കുഷ്‌നര്‍ സഊദി കിരീടാവകാശി മുഹമ്മദ് ബിന്‍ സല്‍മാനുമായി റിയാദില്‍ കൂടിക്കാഴ്ച നടത്തി. യു.എ.ഇ ഇസ്‌റാഈലുമായി നയതന്ത്രബന്ധം സ്ഥാപിച്ചതിനു പിന്നാലെ കൂടുതല്‍ അറബ് രാജ്യങ്ങള്‍ ഇസ്‌റാഈലുമായി കരാറിലെത്തുമെന്ന് കുഷ്‌നര്‍ നേരത്തെ പറഞ്ഞിരുന്നു.
ഫലസ്തീന്‍ പ്രശ്‌നം പരിഹരിക്കുന്നതുവരെ ഇസ്‌റാഈലുമായി ബന്ധത്തിനില്ലെന്ന് സഊദി വ്യക്തമാക്കിയെങ്കിലും യു.എ.ഇയിലേക്ക് പറക്കാന്‍ ഇസ്‌റാഈല്‍ വിമാനത്തിന് സഊദി വ്യോമപാത അനുവദിച്ചത് വാര്‍ത്തയായിരുന്നു. മേഖലയിലെ സമാധാനശ്രമങ്ങളും ഫലസ്തീന്‍-ഇസ്‌റാഈല്‍ പ്രശ്‌ന പരിഹാരവും ചര്‍ച്ചയില്‍ വന്നെന്നാണ് റിപ്പോര്‍ട്ട്.
അതിനിടെ ഫലസ്തീന്‍ പ്രശ്‌നം അവസാനിക്കണമെങ്കില്‍ ദ്വിരാഷ്ട്ര പരിഹാരം അത്യാവശ്യമാണെന്ന് ഖത്തര്‍ അമീര്‍ ശെയ്ഖ് തമീം ബിന്‍ ഹമദ് ആല്‍ ഥാനി തന്നെ സന്ദര്‍ശിച്ച കുഷ്‌നറോടു പറഞ്ഞു. കിഴക്കന്‍ ജറൂസലം തലസ്ഥാനമായ ഫലസ്തീന്‍ രാജ്യം സ്ഥാപിക്കുന്നതിനെയാണ് ഖത്തര്‍ പിന്തുണയ്ക്കുന്നതെന്നും അദ്ദേഹം അറിയിച്ചു.