മണ്ണാര്‍ക്കാട്: അതിശക്തമായ മഴയില്‍ മണ്ണാര്‍ക്കാട് മേഖലയില്‍ വ്യാപകമായ കൃഷിനാശം. മലയോര മേഖലയിലും മറ്റും ഗ്രാമീണ മേഖലകളിലും ഒരുപോലെയാണ് മഴക്കെടുതികള്‍ ഉണ്ടായത്. കോട്ടാപ്പാടം അമ്പലപ്പാറയിലെ കരടിയോട്, കൂമരംപുത്തൂര്‍ മൈലാമ്പാടത്തെ പൊതുവപ്പാടം, തെങ്കരയിലെ തത്തേങ്ങലം എന്നീ മലകളിലാണ് ഉരുള്‍ പൊട്ടലും തുടര്‍ന്ന് കര കവിഞ്ഞ മഴവെളളപ്പാച്ചിലില്‍ വ്യാപകമായ കൃഷിനാശവുമുണ്ടായത്.
പ്രദേശത്തെ പുഴകളും തോടുകളും അതിശക്തമായാണ് കരകവിഞ്ഞൊഴുകിയത്. ഇവയെല്ലാം പ്രദേശത്ത് വ്യാപകമായ കൃഷി നാശമാണ് ഉണ്ടാക്കിയത്. ഓണം വിപണി ലക്ഷ്യമാക്കിയ വാഴ, കപ്പ, പച്ചക്കറികള്‍ എന്നിവയും കൂടാതെ റബര്‍, കമുങ്ങ് തുടങ്ങിയവയാണ് പ്രധാനമായും നശിച്ചത്.
മുന്‍ വര്‍ഷത്തെ അപേക്ഷിച്ച് ഇത്തവണ വാഴ കൃഷി കുറവായിരുന്നു. അതില്‍ ഭൂരിഭാഗവും മഴയില്‍ നിലംപൊത്തിയതോടുകൂടി ഓണവിണയില്‍ പഴത്തിന് വലിയ വിലയാണുണ്ടായത്. കൃഷി നാശം മൂലം കര്‍ഷകര്‍ക്ക് കാര്‍ഷികാവശ്യത്തിന് എടുത്ത ബാങ്ക് വായ്പകളടക്കം തിരിച്ചടക്കാനൊ, പുതിയ കൃഷിയിറക്കാനാവശ്യമായ വിത്തും വളവും ഇറക്കാനാവശ്യമായ പണമൊ ഇല്ലാത്ത സ്ഥിതിയാണുളളത്. ഒപ്പം കൃഷിയിടങ്ങളില്‍ സജീവമായി മാറിയ അന്യസംസ്ഥാന തൊഴിലാളികളെല്ലാം കൂട്ടത്തോടെ അവരുടെ നാടുകളിലേക്ക് തിരിച്ചുപോയത് ഈ മേഖലയില്‍ തൊഴില്‍ ക്ഷാമം രൂക്ഷമാക്കുവാനും കാരണമായിട്ടുണ്ട്.
മേഖലയില്‍ ഭൂരിഭാഗവും നാമമാത്ര കൃഷിക്കാരാണ്. അതുകൊണ്ട് തന്നെ വിള ഇന്‍ഷുറന്‍സ് പദ്ധതിയില്‍ അംഗങ്ങളുമല്ല. ഇതുകാരണം വിളനാശത്തിന് നഷ്ടപരിഹാര തുക ലഭിക്കുമെന്ന സാധ്യതയുമില്ല. ഇത് പ്രതിസന്ധി ഏറെ രൂക്ഷമാക്കാനിടയാക്കും.
സര്‍ക്കാര്‍ നല്‍കുന്ന സഹായ പദ്ധതിയില്‍ വിള ഇന്‍ഷുറന്‍സ് പദ്ധതിയില്‍ വരാത്ത കര്‍ഷകരെ കൂടി ഉള്‍പ്പെടുത്തണമെന്നാണ് ഭൂരിഭാഗം കര്‍ഷകരുടെയും ആവശ്യം.