രാജപുരം: കിടപ്പുരോഗികളുടെ ചികിത്സാച്ചെലവിനു പണം കണ്ടെത്താന്‍ ഗാനമേളകള്‍ നടത്തി കാരുണ്യ പ്രവര്‍ത്തനത്തിലേര്‍പ്പെട്ട് ശ്രദ്ധേയരായ ദേവഗീതം ഓര്‍ക്കസ്ട്ര ഒരിക്കല്‍ കൂടി കാരുണ്യ പ്രവര്‍ത്തനത്തിനിറങ്ങുന്നു. ഇത്തവണയെത്തുന്നത് നാടിനെ വിഴുങ്ങിയ പ്രളയദുരിതത്തിന് ഒരു കൈത്താങ്ങാവുക എന്ന ലക്ഷ്യത്തോടെയാണ്.
മുഖ്യമന്ത്രിയുടെ ദുരിതാശ്വാസനിധിയിലേക്ക് പണം കണ്ടെത്താന്‍ ഇന്നു വൈകുന്നേരം പൂടങ്കല്ലില്‍ ഗാനമേള നടത്തും. ടിക്കറ്റോ പാസോ ഇല്ലാതെയാണ് പരിപാടി. ആസ്വാദകര്‍ നല്‍കുന്ന വലിപ്പച്ചെറുപ്പമില്ലാത്ത തുക സ്വീകരിച്ച് അവ ദുരിതാശ്വാസ നിധിയിലേക്ക് എത്തിക്കുകയാണ് ലക്ഷ്യം. വെകുന്നേരം ആറുമുതല്‍ ഗാന്ധിനഗര്‍ മിനി സ്റ്റേഡിയത്തിലാണ് പരിപാടി.
സ്വകാര്യ ചാനലില്‍ സംഗീത പരിപാടി അവതരിപ്പിച്ച് പ്രശസ്തനായ രതീഷ് കണ്ടടുക്കം നയിക്കുന്ന ദേവഗീതം ഓര്‍ക്കസ്ട്രയും മലയോര പൗരാവലിയും കൈകോര്‍ത്താണ് പരിപാടി നടത്തുന്നത്. കള്ളാര്‍ ഗ്രാമപഞ്ചായത്ത് പ്രസിഡന്റ് ത്രേസ്യാമ്മാ ജോസഫ് ഉദ്ഘാടനം ചെയ്യും.