തിരുവനന്തപുരം: ഹയര്‍സെക്കന്‍ഡറി അധ്യാപക തസ്തികയിലേക്ക് അഡ്വൈസ് മെമ്മൊ കിട്ടി ആറുമാസം പിന്നിട്ടിട്ടും നിയമന ഉത്തരവ് നല്‍കാതെ പി.എസ്.സി. വിഷയത്തില്‍ സമരത്തിനൊരുങ്ങുകയാണ് ഉദ്യോഗാര്‍ഥികള്‍. വ്യത്യസ്ത വിഷയങ്ങളിലായി നൂറിലധികം പേര്‍ക്കാണ് ഫെബ്രുവരിയില്‍ അഡൈ്വസ് മെമ്മോ ലഭിച്ചത്. എന്നാല്‍, നിയമനം നല്‍കാനുള്ള നടപടികള്‍ പി.എസ്.സി നടത്തുന്നില്ല. പി.എസ്.സിയെ സമീപിച്ചിട്ടും വ്യക്തമായ ഉത്തരം നല്‍കുന്നില്ലെന്നാണ് ഉദ്യോഗാര്‍ഥികള്‍ പറയുന്നത്. ഹയര്‍സെക്കന്‍ഡറി എക്കണോമിക്‌സിനാണ് ഏറ്റവും കൂടുതല്‍ പേര്‍ക്ക് അഡൈ്വസ് മെമ്മോ ലഭിച്ചത്. 96 പേര്‍ക്ക് അഡൈ്വസ് മെമ്മൊ അയച്ചെങ്കിലും ഒരാള്‍ക്കും നിയമനം നല്‍കിയിട്ടില്ല. സുവോളജി, ബോട്ടണി വിഷയങ്ങളിലും അഡൈ്വസ് മെമ്മൊ അയച്ചിരുന്നു. അഡൈ്വസ് മെമ്മൊ അയച്ചാല്‍ മൂന്നുമാസത്തിനകം നിയമനം നടത്തണമെന്നാണ് പി.എസ്.സി ചട്ടം.