കണ്ണൂര്‍: സര്‍വകലാശാലാ തലശ്ശേരി കാംപസില്‍ എല്‍.എല്‍.എമ്മിനു താല്‍കാലിക പ്രവേശനം നേടി യൂനിയന്‍ തെരഞ്ഞെടുപ്പില്‍ സ്ഥാനാര്‍ഥികളായ എസ്.എഫ്.ഐ നേതാക്കളുടെ പ്രവേശനം റദ്ദാക്കിയ സാഹചര്യത്തില്‍ ഇന്നു നടക്കുന്ന തെരഞ്ഞെടുപ്പില്‍ കെ.എസ്.യു, എ.ഐ.എസ്.എഫ് സ്ഥാനാര്‍ഥികള്‍ എതിരില്ലാതെ തെരഞ്ഞെടുക്കപ്പെടും. യു.യു.സി സ്ഥാനത്തേക്ക് എസ്.എഫ്.ഐ ജില്ലാകമ്മിറ്റി അംഗം എം.കെ ഹസനും ചെയര്‍മാന്‍ സ്ഥാനത്തേക്കു ഏരിയാകമ്മിറ്റി അംഗം മുഹമ്മദ് മുബഷിറും മത്സരിക്കാനാണു തീരുമാനിച്ചത്. എന്നാല്‍ ഇവര്‍ എല്‍.എല്‍.ബി പാസാവാതെയാണ് എല്‍.എല്‍.എമ്മിനു പ്രവേശനം നേടിയതെന്നു അധികൃതര്‍ കണ്ടെത്തിയിരുന്നു. പ്രതിഷേധം ശക്തമായതോടെ ഇവര്‍ ഉള്‍പ്പെടെ അഞ്ചു വിദ്യാര്‍ഥികളുടെ പ്രവേശനം റദ്ദാക്കുകയായിരുന്നു. ഈ സാഹചര്യത്തില്‍ തെരഞ്ഞെടുപ്പ് മാറ്റിവയ്ക്കുക, റദ്ദാക്കുക തുടങ്ങിയ ആവശ്യവുമായി വിദ്യാര്‍ഥി സംഘടനകള്‍ രംഗത്തെത്തിയിരുന്നു. എന്നാല്‍ നിലവിലെ സാഹചര്യത്തില്‍ തെരഞ്ഞെടുപ്പ് നടത്താന്‍ തന്നെയാണു വൈസ് ചാന്‍സലറുടെ നിര്‍ദേശം. ഇതോടെ കെ.എസ്.യുവില്‍ നിന്നുള്ള കെ.എം ആദര്‍ശ് ചെയര്‍മാനായും എ.ഐ.എസ്.എഫില്‍ നിന്നുള്ള എ.എം റഹ്മത്തിനെ യു.യു.സിയായും എതിരില്ലാതെ തെരഞ്ഞെടുത്തേക്കും.