കോഴിക്കോട്: ബംഗ്ലാദേശ് പെണ്‍കുട്ടികളുള്‍പ്പെട്ട പെണ്‍വാണിഭക്കേസില്‍ കാപ്പ ചുമത്തി നടക്കാവ് പൊലിസ് അറസ്റ്റ് ചെയ്ത പ്രതിയുടെ ദൃശ്യങ്ങള്‍ പകര്‍ത്തുന്നതിനിടെ ചാനല്‍ കാമറാമാനു നേരെ അതിക്രമം.
ഇന്നലെ രാത്രി കോഴിക്കോട് നടക്കാവ് പൊലിസ് സ്റ്റേഷനിലെത്തിച്ച പ്രതിയുടെ ദൃശ്യങ്ങള്‍ പകര്‍ത്തുന്നതിനിടെ ഇയാള്‍ കാമറ തട്ടിയിടാന്‍ ശ്രമിക്കുകയായിരുന്നു.
തുടര്‍ന്നു മാധ്യമപ്രവര്‍ത്തകര്‍ക്കു നേരെ ഇയാള്‍ വധഭീഷണി മുഴക്കി. മുഖം മറച്ചാണ് ഇയാളെ സ്റ്റേഷനിലെത്തിച്ചത്. ജില്ലാ കലക്ടര്‍ എന്‍. പ്രശാന്ത് കഴിഞ്ഞ ദിവസം പുറപ്പെടുവിച്ച ഉത്തരവനുസരിച്ച് കാപ്പ ചുമത്തിയതിനെ തുടര്‍ന്ന് വയനാട്ടില്‍ നിന്നു കുടുംബസമേതം പാളയത്ത് ബസിറങ്ങിയ ഇയാളെ പൊലിസ് പിടികൂടുകയായിരുന്നു. അതിക്രമം നടത്തിയതിനെത്തുടര്‍ന്ന് പൊലിസ് പുതിയ കേസ് രജിസ്റ്റര്‍ ചെയ്തു.