മലപ്പുറം: സി.പി.ഐക്കെതിരായ പരാമര്‍ശത്തില്‍ പി.വി അന്‍വര്‍ എം.എല്‍.എക്കെതിരെ പരസ്യ പ്രതിഷേധവുമായി എ.ഐ.വൈ.എഫ്. മലപ്പുറം ജില്ലാ കമ്മിറ്റിയുടെ നേതൃത്വത്തില്‍ എ.ഐ.വൈ.എഫ് പ്രവര്‍ത്തകര്‍ അന്‍വറിന്റെ കോലം കത്തിച്ചു. സി.പി.ഐക്കെതിരെ വിമര്‍ശനം തുടര്‍ന്നാല്‍ കടുത്ത പ്രതിഷേധം നേരിടേണ്ടിവരുമെന്നും നേതാക്കള്‍ വ്യക്തമാക്കി.

തെരഞ്ഞെടുപ്പ് കഴിഞ്ഞ് തൊട്ടുപിന്നാലെ തന്നെ പൊന്നാനിയില്‍ പി വി അന്‍വറും സിപിഐയും തമ്മിലുള്ള അഭിപ്രായ വ്യത്യാസങ്ങള്‍ മറനീക്കി പുറത്തു വന്നിരുന്നു. തെരഞ്ഞെടുപ്പില്‍ സിപിഐ തന്നെ സഹായിച്ചില്ലെന്നായിരുന്നു പി വി അന്‍വറിന്റെ പരാതി. മാത്രവുമല്ല മുസ്‌ലിം ലീഗിനൊപ്പമാണ് മലപ്പുറം ജില്ലയിലെ സി.പി.ഐയെന്നും പി വി അന്‍വര്‍ ആരോപിച്ചിരുന്നു. വയനാട്ടിലെ എല്‍.ഡി.എഫ് സ്ഥാനാര്‍ത്ഥിയും സി.പി.ഐ നേതാവുമായ പി പി സുനീര്‍ ലീഗിലേക്ക് ചേക്കേറാനുള്ള ശ്രമത്തിലാണെന്നും അന്‍വര്‍ ആരോപിച്ചിരുന്നു.

പി.വി അന്‍വറിന് ഇടതുപക്ഷ മനസ് നഷ്ടപ്പെട്ടു. ഈ ഭാണ്ഡം പേറേണ്ട ബാധ്യത ഇടതുപക്ഷത്തിനില്ല. പാര്‍ട്ടി ജില്ലാ സെക്രട്ടറി പ്രതികരിച്ച ശേഷവും വീണ്ടും പി.വി അന്‍വര്‍ നിരുത്തരവാദപരമായ പ്രസ്താവനകളുമായി വരുന്നത് ദൗര്‍ഭാഗ്യകരമാണെന്നും എ.ഐ.വൈ.എഫ് നിലപാട് വ്യക്തമാക്കുന്നു. സി.പി.എമ്മിന് അന്‍വറിന്റെ അഭിപ്രായവുമായി യോജിപ്പുണ്ടാകില്ലെങ്കിലും അന്‍വറിനെ തിരുത്തണമെന്നും നിലപാട് വ്യക്തമാക്കണമെന്നും എ.ഐ.വൈ.എഫ് പറയുന്നു. വിമര്‍ശനം തുടര്‍ന്നാല്‍ പ്രതിഷേധം ശക്തമാക്കാനാണ് എ.ഐ.വൈ.എഫ് തീരുമാനം.

മലപ്പുറം ജില്ലയുടെ മുഴുവന്‍ കേന്ദ്രങ്ങളിലും പ്രതിഷേധ പ്രകടനത്തിനും ജില്ലാ കമ്മിറ്റി ആഹ്വാനം ചെയ്തിട്ടുണ്ട്.