തിരുവനന്തപുരം: കേരള പബ്ലിക് സര്‍വിസ് കമ്മിഷന്‍ നാളെയും മറ്റന്നാളുമായി നടത്താന്‍ നിശ്ചയിച്ചിരിക്കുന്ന വകുപ്പുതല ഓണ്‍ലൈന്‍ പരീക്ഷയ്ക്ക് തിരുവനന്തപുരം, പാലക്കാട്, മലപ്പുറം ജില്ലകളില്‍ ഉള്‍പ്പെടുത്തിയിരുന്ന ഉദ്യോഗാര്‍ഥികളെ ചില സാങ്കേതിക കാരണങ്ങളാല്‍ അതേ ജില്ലകളിലുള്ള വിവിധ പരീക്ഷാകേന്ദ്രങ്ങളിലേക്ക് മാറ്റിയതായി പി.എസ്.സി അറിയിച്ചു.
നാല്, അഞ്ച് തിയതികളില്‍ പാലക്കാട് എന്‍.എസ്.എസ്.എന്‍ജിനീയറിങ് കോളജ് കേന്ദ്രമായി ലഭിച്ചിട്ടുള്ളവര്‍ പ്രൊഫൈലില്‍ നിന്നും പുതിയ അഡ്മിഷന്‍ ടിക്കറ്റ് എടുത്തശേഷം നാളെ അഡ്മിഷന്‍ ടിക്കറ്റില്‍ രേഖപ്പെടുത്തിയ സമയത്ത് പാലക്കാട് ജില്ലയില്‍ ശ്രീകൃഷ്ണപുരം സര്‍ക്കാര്‍ എന്‍ജിനീയറിങ് കോളജില്‍ ഹാജരാകേണ്ടതാണ്. നാളെ മലപ്പുറം ജില്ലയില്‍ കുറ്റിപ്പുറം എം.ഇ.എസ് എന്‍ജിനീയറിങ് കോളജ് കേന്ദ്രമായി ലഭിച്ചിട്ടുള്ളവര്‍ പുതിയ അഡ്മിഷന്‍ ടിക്കറ്റ് എടുത്തശേഷം അഞ്ചിന് നിര്‍ദിഷ്ട സമയത്ത് ഇതേ കേന്ദ്രത്തില്‍ തന്നെ പരീക്ഷയ്ക്ക് ഹാജരാകേണ്ടതാണ്.
കഴിഞ്ഞ 18നു മുന്‍പായി അഡ്മിഷന്‍ ടിക്കറ്റ് എടുത്തവരില്‍ നാളെ തിരുവനന്തപുരം ജില്ലയില്‍ എല്‍.ബി.എസ് എന്‍ജിനീയറിങ് കോളജ്, പൂജപ്പുര പരീക്ഷകേന്ദ്രമായി ലഭിച്ചിട്ടുള്ളവര്‍ പുതിയ അഡ്മിഷന്‍ ടിക്കറ്റ് എടുത്തശേഷം അന്നേദിവസം നിര്‍ദിഷ്ട സമയത്ത് സി.എ.പി.ഇന്റെ കീഴിലുള്ള മുട്ടത്തറ എന്‍ജിനീയറിങ് കോളജില്‍ പരീക്ഷയ്ക്ക് ഹാജരാകണം.