ന്യൂഡല്‍ഹി: അസിസ്റ്റന്റ് പ്രൊഫസര്‍, ജൂനിയര്‍ റിസര്‍ച്ച് ഫെലോഷിപ്പ് യോഗ്യതാ പരീക്ഷയായ നെറ്റ് പരീക്ഷയ്ക്ക് നാലു ദിനം മാത്രം ബാക്കിനില്‍ക്കേ ഇതുവരെ അഡ്മിറ്റ് കാര്‍ഡ് ലഭ്യമാക്കിയില്ല. സെപ്റ്റംബര്‍ 16 മുതല്‍ പരീക്ഷ ആരംഭിക്കുമെന്നാണ് നടത്തിപ്പ് ചുമതലയുള്ള എന്‍.ടി.എ വ്യക്തമാക്കിയിരുന്നത്. 15 ദിവസം മുന്‍പ് അഡ്മിറ്റ് കാര്‍ഡ് ലഭ്യമാക്കുമെന്നും അറിയിച്ചിരുന്നു.

കൊവിഡ് കാരണമാണ് ജൂണില്‍ നടക്കേണ്ടിയിരുന്ന പരീക്ഷ ഇതുവരെ നീട്ടിയത്. പുതിയ തിയ്യതി പ്രഖ്യാപിച്ചെങ്കിലും ഇപ്പോഴുള്ള അനിശ്ചിതത്വത്തിനുള്ള കാരണമെന്തെന്ന് വ്യക്തമല്ല. 16 മുതലുള്ള പരീക്ഷയ്ക്ക് ഇതുവരെ അഡ്മിറ്റ് കാര്‍ഡ് ലഭ്യമാക്കാത്തത് എന്തുകൊണ്ടാണെന്നും ഇതുവരെ എന്‍.ടി.എ വിശദീകരിച്ചിട്ടില്ല.

കംപ്യൂട്ടര്‍ ബേസ്ഡ് ടെസ്റ്റ് (സി.ബി.ടി) പരീക്ഷണാണ് നടക്കുന്നത്. കൊവിഡ് വ്യാപനത്തിന്റെ പശ്ചാത്തലത്തില്‍ കടുത്ത നിയന്ത്രണങ്ങളോടെയാണ് ഓരോ പരീക്ഷാ സെന്ററുകളും ഒരുക്കുക. പരീക്ഷാകേന്ദ്രത്തില്‍ പ്രവേശിക്കുന്നതിനു മുന്‍പ് വിദ്യാര്‍ഥികള്‍ അണുവിമുക്തരാവുകയും തെര്‍മര്‍ പരിശോധനയ്ക്ക് വിധേയരാവുകയും ചെയ്യണം. പ്രവേശനത്തിനു മുന്‍പ് 3 ലെയര്‍ മാസ്‌കുകളും പരീക്ഷാര്‍ഥികള്‍ക്കായി നല്‍കും.