തിരുവനന്തപുരം: പ്രളയക്കെടുതിയില്‍ തകര്‍ന്ന സംസ്ഥാനത്തിന്റെ പുനര്‍നിര്‍മാണം ഒരു ഏജന്‍സിയില്‍ മാത്രം ഒതുക്കി നിര്‍ത്തുകയില്ലെന്നും എല്ലാവരുടേയും സഹായം ഉറപ്പാക്കുമെന്നും മുഖ്യമന്ത്രി പിണറായി വിജയന്‍.
പുനര്‍നിര്‍മാണത്തിനായി സന്നദ്ധത അറിയിച്ച കണ്‍സള്‍ട്ടന്‍സിയായ കെ.പി.എം.ജിയുടെ സേവനം സൗജന്യമാണ്. അന്താരാഷ്ട്ര ഏജന്‍സികളുടെ സഹകരണത്തോടെ കെ.പി.എം.ജിക്ക് പ്രവര്‍ത്തിക്കാനാകും. അതിനാലാണ് കണ്‍സള്‍ട്ടന്‍സി ഇവര്‍ക്ക് നല്‍കാന്‍ തീരുമാനിച്ചത്. ഇത്തരത്തില്‍ സഹായം നല്‍കാന്‍ സന്നദ്ധരായ വിവിധ ഏജന്‍സികളുണ്ടാവാം. അവരുടെ സഹകരണവും ഉറപ്പാക്കണം.
എല്ലാവരുടേയും സഹായത്തോടെ മികവുറ്റത് കണ്ടെത്തണമെന്നും മുഖ്യമന്ത്രി പറഞ്ഞു. ദുരന്തനിവാരണത്തില്‍ പ്രവര്‍ത്തിച്ച ഐ.എ.എസ് ഉദ്യോഗസ്ഥരെ ആദരിക്കുന്ന ചടങ്ങില്‍ സംസാരിക്കുകയായിരുന്നു അദ്ദേഹം. ഇനിയുള്ളത് പുനരധിവാസ, പുനര്‍നിര്‍മാണ ഘട്ടങ്ങളാണ്. ഖജനാവിന്റെ അവസ്ഥ എല്ലാവര്‍ക്കുമറിയാം. നാട് പൊതുവില്‍ സാമ്പത്തികമായി ദുര്‍ഭലമാണെങ്കിലും പുറത്ത് സാമ്പത്തിക മികവുള്ളവരുണ്ട്. ഒത്തുപിടിച്ചാല്‍ അവരില്‍നിന്ന് വലിയ സഹായങ്ങള്‍ നമുക്ക് ലഭിക്കും. നമുക്ക് ആവശ്യമുള്ള തുക മുഴുവന്‍ അനുവദിക്കാന്‍ കേന്ദ്രസര്‍ക്കാരിന് സാധ്യമല്ല. ആവശ്യപ്പെട്ടത് ദുരന്തത്തിന്റെ നഷ്ടപരിഹാരവുമല്ല, സ്‌പെഷല്‍ പാക്കേജാണ്. എങ്കിലും അതിന് പരിമിതിയുണ്ട്. വിഭവസമാഹരണം നാം തന്നെ നടത്തണം. കൃത്യമായ ആസൂത്രണത്തിലൂടെ നമുക്ക് ഇതിന് കഴിയണം. സമയബന്ധിതമായി ഓരോ കാര്യവും തീര്‍ക്കണം. തകര്‍ന്നവയുടെ കണക്കുകള്‍ കൃത്യമായിരിക്കണമെന്നും മുഖ്യമന്ത്രി പറഞ്ഞു. ചീഫ് സെക്രട്ടറിയെ കൂടാതെ വിവിധ അഡീഷനല്‍ ചീഫ് സെക്രട്ടറിമാര്‍, സെക്രട്ടറിമാര്‍, ജില്ലാ കലക്ടര്‍മാര്‍, മറ്റു ഉന്നത ഉദ്യോഗസ്ഥര്‍ സംബന്ധിച്ചു.