ബംഗളൂരു: സണ്‍റൈസേഴ്‌സ് ഹൈദരാബാദിന്റെ പ്ലേ ഓഫ് സ്വപ്‌നത്തിന് അവസാന കളിയില്‍ ബാംഗ്ലൂരിന്റെ ചെക്ക്. ബാംഗ്ലൂര്‍ ഹൈദരാബാദിനെ നാല് വിക്കറ്റിന് തോല്‍പിച്ചു.
ആദ്യം ബാറ്റ് ചെയ്ത ഹൈദരാബാദ് നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 175 റണ്‍സെടുത്തു. മറുപടി ബാറ്റിങ്ങിനിറങ്ങിയ ബാംഗ്ലൂര്‍ നാല് പന്ത് ശേഷിക്കെ വിജയം കണ്ടു. ആറ് വിക്കറ്റ് നഷ്ടത്തില്‍ 178 റണ്‍സ് ബാംഗ്ലൂര്‍ നേടി. 20 റണ്‍സെടുക്കുന്നതിനു മുന്‍പേ മുന്‍നിര ബാറ്റ്‌സ്മാന്‍മാര്‍ നഷ്ടമായ ബാംഗ്ലൂരിന് സ്വന്തം തട്ടകത്തില്‍ അവസാന വിജയം നല്‍കിയത് ഹെറ്റ്‌മെയര്‍(47 പന്തില്‍ 75), ഗുര്‍കീറത്ത് സിങ് (48 പന്തില്‍ 65) കൂട്ടുകെട്ടാണ്. ബാംഗ്ലൂരിന് വേണ്ടി പാര്‍ഥിവ് പട്ടേല്‍ 0, കൊഹ്‌ലി 16, ഡിവില്ല്യേഴ്‌സ് 1, ഗ്രാന്‍ഡ്‌ഹോം 3, വാഷിങ്ടണ്‍ സുന്ദര്‍0, ഉമേഷ് യാദവ് 9 റണ്‍സ് നേടി.ഹൈദരാബാദിനായി വില്ല്യംസണ്‍ 70, സാഹ 20, ഗുപ്തില്‍ 30, വിജയ് ശങ്കര്‍ 27 എന്നിവര്‍ രണ്ടക്കം കണ്ടു. ഇന്നു നടക്കുന്ന മുംബൈ കൊല്‍ക്കത്ത മത്സര ഫലം അപേക്ഷിച്ചായിരിക്കും ഹൈദരാബാദിന്റെ പ്ലേ ഓഫ് സാധ്യത.