തൊടുപുഴ: ഇടുക്കി അണക്കെട്ടിലെ ജലനിരപ്പ് 2394.1 അടിയായി താഴ്ന്നു. ഇതോടെ ചെറുതോണി അണക്കെട്ടിന്റെ ഒരു ഷട്ടര്‍ ഒഴിച്ച് ബാക്കിയെല്ലാം താഴ്ത്തി. മധ്യഭാഗത്തെ (മൂന്നാം നമ്പര്‍) ഷട്ടറാണ് ഇപ്പോള്‍ 1.2 മീ. ഉയര്‍ത്തിയിരിക്കുന്നത്.
സെക്കന്‍ഡില്‍ 100 ക്യുമെക്‌സ് (സെക്കന്‍ഡില്‍ ഒരു ലക്ഷം ലിറ്റര്‍) വെള്ളമാണ് പുറത്തേക്ക് ഒഴുകുന്നത്. മണിക്കൂറില്‍ 125 ക്യുമെക്‌സ് വെള്ളം അണക്കെട്ടിലേക്ക് ഒഴുകിയെത്തുന്നു. 117 ക്യുമെക്‌സാണ് മൂലമറ്റം പവര്‍ഹൗസിലേക്ക് വൈദ്യുതി ഉല്‍പാദനത്തിനായി എടുക്കുന്നത്. 15.005 ദശലക്ഷം യൂനിറ്റായിരുന്നു മൂലമറ്റത്തെ ഇന്നലത്തെ ഉല്‍പാദനം. 20.4 മി.മീ മഴ ഇന്നലെ അണക്കെട്ടിന്റെ വൃഷ്ടിപ്രദേശത്ത് രേഖപ്പെടുത്തി. ശേഷിയുടെ 90 ശതമാനമാണ് ഇപ്പോള്‍ അണക്കെട്ടിലെ ജലനിരപ്പ്. ഓഗസ്റ്റ് ഒന്‍പതിനാണ് ഇടുക്കി അണക്കെട്ടില്‍നിന്ന് വെള്ളം ഒഴുക്കിത്തുടങ്ങിയത്. 50 ക്യുമെക്‌സില്‍ തുടങ്ങി 1700 ക്യുമെക്‌സ് വരെ വെള്ളമൊഴുക്കിയിരുന്നു.